У Маскве пачаліся перамовы кіраўнікоў Беларусі і Расеі Аляксандра Лукашэнкі і Ўладзімера Пуціна.
Паводле Пуціна, «нам ёсьць пра што пагаварыць».
«Мы вас чакалі з гэтым афіцыйным візытам, вельмі рады, што гэта, нягледзячы на ўсялякія бягучыя праблемы, арганізавана, што вы прыехалі для грунтоўнай гутаркі па ўсім комплексе расейска-беларускіх адносін», — сказаў Пуцін.
Сустрэча Лукашэнкі з Пуціным пачалася каля 13 гадзінаў. Лукашэнка прыбыў у Маскву ўвечары 14 жніўня.
«Мы выдатна ведаем, што трэба Расеі ад Беларусі, упэўнены, што Расея абсалютна ведае, што трэба Беларусі ад Расеі, я думаю, што рашэньне тых праблем, якія ў нас існуюць, яшчэ больш зблізіць нашы народы. Хоць, шчыра кажучы, мераць нас з вамі клясычнымі рамкамі ўзаемаадносін зь іншымі дзяржавамі неяк нават няёмка, таму што ў нас настолькі блізкія адносіны, што тут не падыходзяць гэтыя крытэры», — сказаў кіраўнік Беларусі.
Лукашэнка зьбіраўся зь першым пасьля выбараў візытам у Расею 25-26 лістапада. Аднак паездка была адмененая нібыта з-за надзвычайнай загружанасьці двух прэзыдэнтаў.
