Лінкі ўнівэрсальнага доступу

Парашэнка падтрымлівае ідэю аб пазбаўленьні грамадзянства Ўкраіны за сэпаратызм


Прэзыдэнт Украіны Пётр Парашэнка заявіў, што прававых падставаў для пазбаўленьня грамадзянства Ўкраіны за сэпаратызм пакуль няма, аднак неабходныя зьмены ў заканадаўства па гэтым пытаньні. Пра гэта гаворыцца ў адказе на электронную пэтыцыю «Аб пазбаўленьні грамадзянства асоб за сэпаратызм».

«Аналіз дзеючага заканадаўства ў сфэры грамадзянства і Крымінальным кодэксе Ўкраіны сьведчаць аб адсутнасьці прававых падставаў для пазбаўленьня грамадзянства за зьдзяйсьненьне замаху на тэрытарыяльную цэласнасьць і недатыкальнасьць Украіны», — гаворыцца ў адказе прэзыдэнта. У той жа час Парашэнка адзначыў, што зьвярнуўся ў Кабмін з прапановай распрацаваць азначаныя ў электроннай пэтыцыі пытаньні з улікам сусьветнага вопыту ў вырашэньні падобных праблем і прыняць меры ў адпаведнасьці з заканадаўствам.

Пэтыцыю аб пазбаўленьні грамадзянства Ўкраіны за сэпаратызм падалі ў верасьні, дакумэнт сабраў 26744 подпісаў. Згодна з законам аб электронных пэтыцыях, зварот, адрасаваны прэзыдэнту, парлямэнту або ўраду, павінен набраць у сваю падтрымку ня менш за 25 тысяч подпісаў грамадзян на працягу трох месяцаў з дня апублікаваньня пэтыцыі. У выпадку, калі пэтыцыя сабрала неабходную колькасьць галасоў, разгляд ажыцьцяўляецца на працягу 10 працоўных дзён з дня публікацыі аб пачатку разгляду.

Разьдзел пэтыцыяў на сайце прэзыдэнта пачаў працу сёлета ў канцы жніўня.

XS
SM
MD
LG