На краўдфандынгу Ulej.by зьбіраюць грошы на росьпіс будынка Гомельскага дзяржунівэрсытэта імя Францішка Скарыны. Там мае зьявіцца выява Скарыны.
Як адзначаецца на сайце, у Гомелі зьбіраюцца расьпісаць сьцяну першага корпуса ўнівэрсытэта, якая выходзіць на цэнтральную вуліцу горада. Плошча графіці — 64 квадратныя мэтры. Пад выявай першадрукара будзе зьмешчаны надпіс «Сьвятло ведаў перамагае цемру невуцтва».
Кіраўніцтва Гомельскага дзяржунівэрсытэта падтрымала ідэю. Аднак грошы на росьпіс не прадугледжаныя ў бюджэце навучальнай установы, таму аўтары ідэі абвясьцілі збор сродкаў на краўдфандынгу Ulej.by. На сёньня там сабрана 300 тысяч з 67 мільёнаў рублёў.
Як лічаць ініцыятары графіці, зьяўленьне Скарыны на будынку ўнівэрсытэта прывядзе і да папулярызацыі вобразу першадрукара, і да прыцягненьня ўвагі гараджан да нацыянальнай мовы.
