Лінкі ўнівэрсальнага доступу

ЗША: удары па сырыйскай арміі нанесьлі расейскія самалёты


Ілюстрацыйнае фота. Сырыйскія вайскоўцы

Ілюстрацыйнае фота. Сырыйскія вайскоўцы

Прадстаўнік Пэнтагону заявіў аб тым, што ўдары па лягеры сырыйскай арміі былі нанесеныя расейскімі бамбавікамі.

Сілы кааліцыі дзейнічалі ў дзясятках кілямэтраў ад горада Дайра-Эз-Завур.

Пэнтагон «упэўнены» ў тым, што бомбавыя ўдары па лягеры сырыйскай арміі ў горадзе Дайра-Эз-Завур, у выніку якіх загінулі трое сырыйскіх вайскоўцаў і былі параненыя трынаццаць, былі нанесеныя расейскімі бамбавікамі. Пра гэта заявіў высокапастаўлены прадстаўнік Міністэрства абароны ЗША.

У панядзелак афіцыйны Дамаск накіраваў ліст у ААН, у якім ён абвінаваціў кааліцыю, якую ўзначальвае ЗША, у зьдзяйсьненьні налёту на ваенны лягер у нядзелю ўначы. Паводле сырыйскіх зьвестак, у нападзе прынялі ўдзел чатыры самалёты.

ЗША адпрэчылі абвінавачваньні, заявіўшы аб тым, што самалёты кааліцыі нанесьлі чатыры паветраныя ўдары па нафтавых радовішчах, якія знаходзяцца пад кантролем групоўкі ІДзІЛ. Гэтыя радовішчы разьмешчаныя ў 55 кілямэтрах ад вайсковага лягеру.

«У нас няма ніякіх указаньняў на тое, што сырыйскія салдаты знаходзіліся побач з зонай, дзе наносіліся ўдары», — сказана ў афіцыйнай заяве кааліцыйных сіл.

Крыніца ў Пэнтагоне паведаміла, што, згодна з паказаньнямі радараў, удары былі нанесеныя расейскімі бамбавікамі Ту-22, якія базуюцца на базе ў Маздоку. Яны зрабілі налёты на мэты ў трох гарадах, у тым ліку, і ў Дайра-Эз-Завуры. Большая частка гэтага горада знаходзіцца пад кантролем ісламскіх радыкальных баевікоў, і расейскія самалёты, хутчэй за ўсё, ударылі па лягеры сырыйскай арміі памылкова.

Амэрыканскія вайскоўцы неаднаразова крытыкавалі Расею за выкарыстаньне некіраваных бомбаў і ракет падчас паветраных нападаў у Сырыі, у выніку якіх гіне мірнае насельніцтва.

Паказаць камэнтары

XS
SM
MD
LG