Лінкі ўнівэрсальнага доступу

ЗША бяруць адказнасьць за ролю ў стварэньні праблемы пацяпленьня і змаганьне зь ёю


Барак Абама на кліматычнай канфэрэнцыі ААН у Парыжы

Барак Абама на кліматычнай канфэрэнцыі ААН у Парыжы

Прэзыдэнт ЗША Барак Абама заявіў сёньня на кліматычнай канфэрэнцыі ААН у Парыжы, што Злучаныя Штаты намераны абмежаваць выкіды вуглякіслага газу ў атмасфэру на 26%-28% ад узроўню 2005 году на працягу бліжэйшых 10 гадоў.

«Я прыбыў сюды асабіста як кіраўнік найбольшай эканомікі на сьвеце і як кіраўнік краіны, якая ёсьць другой па велічыні крыніцай парніковых газаў, каб сказаць, што Злучаныя Штаты Амэрыкі ня толькі прызнаюць сваю ролю ў стварэньні гэтай праблемы, але і бяруць на сябе адказнасьць, каб нешта з гэтым зрабіць», — сказаў амэрыканскі прэзыдэнт.

Паводле Абамы, калі клімат будзе зьмяняцца хутчэй, чым спробы дзяржаваў супрацьдзейнічаць гэтаму, сьвет чакае незайздросная будучыня:

«Нашы дзеці ўбачаць затопленыя краіны, пакінутыя гарады, палі, якія болей не даюць ураджаю, палітычную дэстабілізацыю, якая даводзіць да новага канфлікту, і яшчэ большыя патокі адчайных людзей, якія шукаюць прыстанішча ў не сваіх краінах», — адзначыў Барак Абама ў Парыжы.

Напярэдадні канфэрэнцыі Беларусь заявіла, што падтрымлівае калектыўныя намаганьні па дасягненьні асноўнага арыенціру стагодзьдзя — недапушчэньня павышэньня сярэднесусьветнай тэмпэратуры больш чым на 2 градусы Цэльсія ў параўнаньні з даіндустрыяльным пэрыядам. Беларусь узяла на сябе абавязаньне забясьпечыць да 2030 году скарачэньне выкідаў парніковых газаў ня менш чым на 28% ад узроўню выкідаў 1990 году.

XS
SM
MD
LG