Лінкі ўнівэрсальнага доступу

Беларусь зьніжае акцызы на моцны алькаголь і «чарніла». Севярынец: «Гэта злачынства»


П’яныя гамельчукі сьпяць на вуліцы, архіўнае фота

П’яныя гамельчукі сьпяць на вуліцы, архіўнае фота

Адзін зь лідэраў БХД, якая праводзіць антыалькагольную кампанію, лічыць даступнасьць алькаголю ва ўмовах яго празьмернага спажываньня злачынствам ня меншым, чым выкраданьне палітычных апанэнтаў улады.

У праекце бюджэту Беларусі на 2016 год прадугледжаныя захады дзеля падтрымкі алькагольнай галіны, у тым ліку зьмяншэньне акцызаў на моцны алькаголь на 7,4% і на пладовыя віны (у народзе «чарніла») на 7,5%, паведамляе БелаПАН. Акцызныя стаўкі на піва зьмяняць не плянуецца.

Меры скіраваныя на стабілізацыю алькагольнай галіны і паляпшэньне фінансавага стану прадпрыемстваў. Тыя за першае паўгодзьдзе 2015 году панесьлі страты: напрыклад, «Менск-Крышталь» — на 13,3 млрд рублёў, «Белалка» — 10,2 млрд, Клімавіцкі лікёра-гарэлачны завод — 8,5 млрд. Аляксандар Лукашэнка растлумачыў неспрыяльнае становішча спраў у алькагольнай галіне агрэсіўнай падатковай палітыкай, якая праводзілася ў краіне ў апошнія гады — маўляў, гэта «практычна ўгробіла галіну».

Тым часам за студзень-верасень бягучага году рэалізацыя алькагольнай прадукцыі на ўнутраным рынку заўважна зьнізілася: на 18% для моцнага алькаголю, на 20% для пладова-ягадных вінаў і на 3,9% для піва.

Старшыня аргкамітэту па стварэньні партыі «Беларуская хрысьціянская дэмакратыя» Павал Севярынец лічыць зьніжэньне акцызаў злачынствам супраць уласнага народу.

Павал Севярынец

Павал Севярынец

«Такая ініцыятыва — гэта наўпрост спойваньне народу, бо заробкі паніжаюцца, кошты растуць — і, як кажуць, „бяры ты, беларус, танную гарэлку, упівайся і забывай пра ўсё“. Груба кажучы, такую палітыку ўлады вядуць, калі ўсё зусім кепска. І гэта злачынства супраць уласнага народу».

БХД ужо два гады праводзіць антыалькагольную кампанію, дамаўлялася зь мясцовымі ўладамі і зьбірала подпісы за абмежаваньне продажу алькаголю па ўзросьце і па часе. Севярынец лічыць перамогай народу тое, што ў асобных раёнах Беларусі забаранялі прадаваць алькаголь уночы, а таксама забаранялі рэкляму «парасонных» брэндаў, калі дзеля рэклямы гарэлкі ствараліся і рэклямаваліся, напрыклад, пітныя воды пад той жа маркай, што і гарэлка.

«Перад так званымі выбарамі зрабілі алькаголь таньнейшым, абмежаваньні здымаюцца, цяпер і паніжаюцца акцызы. Гэта разбурае генафонд — мы і так ці ня самая пітушчая нацыя ў Эўропе. Думаю, што гэтая лукавая статыстыка (адносна зьніжэньня аб’ёмаў рэалізацыі алькаголю. — РС) павінна давесьці: сталі менш піць, менш грошай у бюджэце, піце, беларусы, больш! Гэта жахліва, калі бюджэт атрымлівае пад 10% ад алькаголю, а потым траціць 2% на культуру альбо 5% на ахову здароўя — гэта палітыка разбурэньня народу, гэта недапушчальна.

Гэта тое ж самае, калі добры сябра сям’і прыходзіць і кажа: „Няма грошай у вас? А хадземце і нап’емся!“. Тое, што цяпер робяць улады, гэта найгоршы варыянт. Бо потым побытавы гвалт, злачыннасьць, „а што ж у нас моладзь такая пайшла“.

Гэта цяжкое злачынства, параўнальнае з выкраданьнямі палітычных апанэнтаў альбо з даступнасьцю абортаў, гэта забіваньне людзей.

Усе разьвітыя краіны прайшлі праблему з алькаголем, маюць досьвед змаганьня, гэты досьвед не за год і не за два, гэта мэтанакіраваная дзяржаўная палітыка. Яна заключаецца ў абмежаваньні часу і ўзросту продажу алькаголю, алькаголь рэалізуецца ў асобных крамах, гэтыя крамы, як правіла, знаходзяцца за горадам альбо ў аддаленай частцы гораду. Няма такой крокавай даступнасьці. Павольна падвышаюцца кошты на алькаголь, якасьць алькаголю, падвышаецца культура піцьця — усё гэта прыводзіць да выцясьненьня алькагалізму як нормы грамадзтва.

Прапановы, якія рабілі хрысьціянскія дэмакраты, якраз і былі такімі крокамі. Бо ў нас, напрыклад, кампанія „Белалка“ ўзяла такую моду будавацца каля каледжаў і школаў, насупраць літаральна. Заходняя Эўропа, Скандынавія, Штаты — алькаголь там можна набыць, але ён досыць дарагі і якасны, людзі не ўспрымаюць алькаголь як норму. Нам, беларусам, трэба ісьці гэтым шляхам, няма патрэбы вынаходзіць ровар — ёсьць досьвед, ёсьць вынікі».

Паказаць камэнтары

XS
SM
MD
LG