Лінкі ўнівэрсальнага доступу

logo-print

Літанкета Свабоды: Павел Абрамовіч


Павел Абрамовіч

Павел Абрамовіч

Павел Абрамовіч нарадзіўся ў Койданаве (Дзяржынску) Менскай вобласьці ў 1977. Скончыў факультэт журналістыкі БДУ (спэцыялізацыя: «Літаратурная работа ў газэтах і часопісах»), працаваў выкладчыкам на катэдры літаратурна-мастацкай крытыкі (курс: «Літаратура і мастацтва ў СМІ»). Падрыхтаваў да абароны кандыдацкую дысэртацыю «Пісьменьніцкая крытыка ў кантэксьце часу: параўнаўчы аналіз».
Звыш 15 гадоў рэгулярна выступае ў друкаваных і электронных мас-мэдыя як літаратурны крытык і аглядальнік; мае акаўнт у Facebook’у, дзе распавядае пра кніжныя навінкі, аналізуе літаратурны працэс, піша нататкі і эсэ, дае парады чытачам.

1. Для каго вы пішаце? (Хто ваш ідэальны чытач?)

Пішу для ўсіх, хто лічыць мастацкую літаратуру неад’емнай часткай уласнага жыцьця. Сваім ідэальным суразмоўцам лічу таго, чыё кола чытаньня супадае з маім.

2. Дзе вам найлепш пішацца, і калі?

Для мяне галоўнае – сама патрэба пісаць. Калі яна ёсьць, прыдатным можа стацца амаль любое месца.

3. Аўтарам якой ужо напісанай кнігі вы хацелі б быць?

Я – літаратурны крытык і ўвадначас чытач. Я шукаю ў кнігах найперш прыгажосьць, і люблю доўга быць у тых літаратурных садах, якія падобныя на францускі Вэрсаль ці наш Батанічны сад. Я не магу быць уласьнікам такіх месцаў, а толькі госьцем, наведвальнікам.

4. Які літаратурны герой найбольш падобны да вас?

Раней на мяне быў падобны герой «Залатога асла» Апулея – юнак Люцый, ахвочы да жанчын і містыкі. Цяпер – Робэрт Нэвіль з кнігі Рычарда Мэцісана «Я – легенда». Чалавек, які ўсё яшчэ верыць у магчымасьць цывілізацыі.

5. Хто ваш улюбёны пісьменьнік?

Восеньню і зімой – ізноў Васіль Быкаў. У гэты пэрыяд я перачытваю яго творы і раблю гэта ўжо 25 гадоў запар.

6. Што вы цяпер чытаеце?

Некалькі кніг паралельна, як звычайна. Акром Быкава, гэта «Пакора» Мішэля Ўэльбэка, «Аўстра-Вугоршчына: лёс імпэрыі» Андрэя Шарага і Яраслава Шымава, «Марк Аўрэлій» Франсуа Фантэна.

7. На якіх замежных мовах (расейская ня лічыцца) вы можаце чытаць?

Па-ўкраінску. Некалі перакладаў публіцыстыку ўкраінскіх інтэлектуалаў для «ARCHE».

8. Якая ваша найбольш улюбёная кніга з напісаных вамі?

Літаратурна-крытычны гіпэртэкст «Чытаць, каб жыць» – мой Жывы часопіс.

9. Якую кнігу вам яшчэ хочацца напісаць?

З назвай «Мой спосаб чытаньня».

10. Калі вы адчуваеце сябе найбольш свабодным?

Падчас чытаньня. І кожным разам, як замаўляю прадпрымальнікам, букіністам патрэбныя мне кнігі.

XS
SM
MD
LG