Актывістку руху ў абарону жывёлаў Вікторыю Паўленку прысудзілі ў Маскве да рэальнага тэрміна пазбаўленьня волі, яе прыхільнікі абвяшчаюць галадоўку. Пра гэта паведамляе расейская служба Радыё Свабода.
Прыхільнікі Вікторыі Паўленкі, асуджанай у панядзелак да паўтара году пазбаўленьня волі, абвяшчаюць бестэрміновую сухую галадоўку. Гагарынскай суд Масквы прызнаў Вікторыю Паўленку вінаватай у крадзяжы сабакі-павадыра ў сьляпой сьпявачкі Юліі Дзьяковай. Таксама суд пастанавіў спагнаць з Паўленкі штраф у памеры 15 тысяч рублёў (230 даляраў). Паўленка, у якой дыягнаставаная дабраякасная пухліна мозгу, была ўзятая пад варту ў зале суда.
«Павучальны фінал. Ня крыўдзіце слабых!» — напісаў у сваім блогу Ўладзімір Маркін, афіцыйны прадстаўнік сьледчага камітэту РФ, які ініцыяваў справу.
Юлія Дзьякава прасіла прызнаць Паўленку вінаватай, але лічыла, што да яе можна ўжыць ўмоўнае пакараньне. Да таго ж яна адмовілася ад матэрыяльных прэтэнзіяў да Вікторыі Паўленкі.
Інцыдэнт адбыўся 29 ліпеня каля мэтро «Прафсаюзная» на паўднёвым захадзе Масквы. Як паведамлялася, «невядомыя скралі ў дзяўчыны-інваліда сабаку, безь якога яна ня можа перасоўвацца па горадзе». Была неадкладна распачата крымінальная справа, а ў сьледчым камітэце Расеі паабяцалі пакараць вінаватых. Шостага жніўня супрацоўнікамі СК сабака быў вернуты яе гаспадыні.
У прыхільнікаў Вікторыі Паўленкі іншая вэрсія. Яны сьцьвярджаюць, што тая знайшла сабаку на вуліцы, дзе той бегаў зусім адзін, без гаспадара. Вікторыя адвезла Дыяну ў профільную каманду дапамогі сабакам гэтай пароды, а потым яе абвінавацілі ў выкраданьні.
Магчыма, сваю ролю ў гэтай справе адыграла тое, што гаспадыня лабрадора Дыяны Юлія Дзьякава — свайго роду знакамітасьць. У 2014 годзе яна прадстаўляла Расею ў фінале міжнароднага фэстывалю «Мы рэха адно аднаго...», прысьвечанага творчасьці польскай сьпявачкі Ганны Герман, які праходзіў у Варшаве. У красавіку 2015 яна стала гераіняй праграмы на расейскім тэлебачаньні «Сёньня вечарам з Андрэем Малахавым».
Прыхільнікі Вікторыі Паўленкі разгарнулі кампанію ў яе падтрымку: на пасяджэньні суду яны апраналі на шыі хусткі фіялетавага колеру з намаляваным на іх адбіткам лапкі, а пасьля забароны судзьдзі на нашэньне такой «атрыбутыкі» пачалі прыходзіць у вопратцы фіялетавых адценьняў. Каардынатар групы падтрымкі Паўленкі Юры Карэцкіх кажа, што кампанія будзе працягнутая. Актывісты абвяшчаюць сухую бестэрміновую галадоўку ў знак пратэсту супраць прысуду, які здаецца ім занадта жорсткім.