Лінкі ўнівэрсальнага доступу

«Што рабіць з тымі беларусамі, якія ваююць на Данбасе?»,— адказваюць магілёўцы


Апытаньне Свабоды: «Паводле МУС Беларусі, у Данбасе за Ўкраіну і за сэпаратыстаў ваюе каля 100 беларусаў — іх трэба пакараць ці заахвоціць?» Адказвалі жыхары Магілёва.

— Шчыра кажучы, я не магу адказаць на гэтае пытаньне. Мы, беларусы, знаходзімся ў такім становішчы, што нам дужа цяжка прымаць нейкія канкрэтныя рашэньні. Мы на ростані. Мы і тут і там. Мы і сварыцца нібыта ні з кім ня хочам, і ў той жа час мы павінны разумець, што гэта таксама нашы людзі.

— Людзі зрабілі свой выбар — на чым баку ваяваць, за чыю праўду. Як наш урад да гэтага ставіцца, я ня ведаю. Але мы павінны ставіцца талерантна да выбару людзей. З гэтым нічога не паробіш: некага купілі, нехта за праўду.

— Трэба неяк караць іх. Яны могуць сюды вайну прывесьці.

— Кожны дарослы чалавек павінен рабіць выбар, разумець, што робіць, і адказваць за гэта. У нас вайскоўцы прымаюць прысягу, каб бараніць краіну ад зьнешняга ворага. А тут атрымліваецца — унутры чужой краіны людзі забіваюць адзін аднаго. Гэтак жа ён можа і ў сваёй краіне паступіць. Такія людзі тады, выходзіць, небясьпечныя.

— Я чуў пра гэта. Абураны. Ды нічога рабіць ня трэба. Гэта іхны выбар. Не пускаць іх туды.

— У кожнага чалавека сваё меркаваньне. Я ж не вітаю тое, што яны запісваюцца на вайну. Трэба бараніць сваю краіну, а не чужую.

— Людзі зарабляюць грошы, выходзіць, на вайне, на сьлязах, на горы чужых людзей. Асуджэньне мае быць найперш іх. Мо і пакараньне. Навошта лезуць туды, куды іх ня просяць? А калі да нас прыйдуць? Ці спадабаецца? Мне — не!

— Няхай вырашае міністар. Калі людзі туды пайшлі, то, відаць, бароняць інтарэсы сваіх сваякоў. А ідэя якая ў іх можа быць? Яны ж беларусы.

— Будзем гаварыць адкрыта: людзі паехалі па грошы. Там чужыя ваююць толькі за грошы. Ня будзе іх ніхто караць — ня тыя ў нас законы.

— Калі гэтыя людзі падпадаюць пад паняцьце «наёмнікі», то тады яны падпадаюць і пад адпаведнае пакараньне. Калі ж не падпадаюць пад гэтую катэгорыю, то ніякіх законаў яны не парушаюць. Тут усё залежыць ад асабістай пазыцыі кожнага, на якім баку ваяваць. Але самае галоўнае, каб ва Ўкраіне быў мір.

XS
SM
MD
LG