Сёньня ў Менску адбылася сустрэча з адным з ідэолягаў «русского мира» Мікалаем Старыкавым. Моладзевыя актывісты спрабавалі сарваць мерапрыемства, усталі зь месцаў і пачалі скандаваць: «Чамадан! Вакзал! Расея!»
Беларускі музыка Лявон Вольскі напісаў у сваім фэйсбуку некалькі прапановаў, як па-іншаму можна было сустрэць Мікалая Старыкава ў Менску.
«Надоечы заяжджаў да нас адзін уплывовы рускі агітатар і прапагандыст. Ня будзем называць прозьвішчаў, навошта?
Дык вось, ён заехаў, а тут абструкцыя: чамадан-вакзал-расея! А ў слове „чамадан“ ужо адразу чуецца сакрамэнтальнае „майдан“... Але я не пра гэта. Я пра мэтады.
Не хачу вучыць, але можна было б спляжыць лекцыю агітатара цераз: уручэньне яму хлеба-солі (10 хв), зачытваньне словаў падзякі ад нейкае неіснуючае структуры (15 хв), ухваленьне ягонае дзейнасьці і спрабаваньне пацалаваць руку (10 хв), крыкі „расія прежде всего“, ці як там у іх прынята (15 хв)? Выкарыстаць напоўніцу сьцягі ЛНР і ДНР... Махаць імі, блытацца, падаць... Карацей, нешта гэткага кшталту. Каб і не дачапіцца, і нешта падазрона-дзіўнавата-ідыятычнае. Just парада.»