Афіша:
Міжнародны дзень студэнтаў
У Менску заплянаванае чарговае пасяджэньне кантактнай групы па ўрэгуляваньні сытуацыі на ўсходзе Ўкраіны.
У гатэлі Юбілейная пройдзе Форум па рэсацыялізацыі былых асуджаных у грамадзтве (у рамках праекту Беларускага Чырвонага Крыжа). У мерапрыемстве возьмуць удзел прадстаўнікі МУС, упраўленьня Дэпартамэнту выкананьня пакараньняў, Менгарвыканкаму, а таксама шэрагу грамадзкіх арганізацый. Пачатак у 11 гадзінаў.
У нацыянальным прэсавым цэнтры адбудзецца прэсавая канфэрэнцыя, прысьвечаная міжнароднаму дню адмовы ад паленьня з удзелам прадстаўнікоў міністэрства аховы здароўя. Пачатак у 11 гадзінаў.
Літаратурны музэй Петруся Броўкі пачынае новы адукацыйны праект «Публічныя лекцыі», першым выступоўцам стане пісьменьнік Альгерд Бахарэвіч. Ён прачытае лекцыю на тэму «Франц Кафка і Андрэй Мрый». Пачатак у 19 гадзінаў.
Грозны, Расея, пасяджэньне суду па справе грамадзянаў Украіны Мікалая Карпюка і Станіслава Клыха, абвінавачаных у ваенных дзеяньнях супраць Расеі ў 1994-1995 гадах.
Кіеў, уступленьне ў дзеяньне санкцый Ўкраіны адносна Расеі.
У гісторыі:
1574 — у Вільні пачала дзейнічаць друкарня Мамонічаў.
1654 — пасьля 14 тыдняў аблогі войска маскоўскага князя Шарамецьева і казакі Залатарэнкі занялі Віцебск.
1906 — у Менску выйшаў першы нумар газэты «Минское слово» (выдавалася да 28 чэрвеня 1912 г.).
1989 — у Празе адбыліся студэнцкія дэманстрацыі, якія далі пачатак «Аксамітнай рэвалюцыі».
1991 — Кангрэс ЗША ўхваляе пагадненьне аб стварэньні зоны вольнага гандлю паміж Злучанымі Штатамі, Канадай і Мэксыкай.
1993 — Судзьдзі з 11 краін сабраліся на першае пасяджэньне Міжнароднага трыбуналу па былой Югаславіі, які стаў першай установай падобнага роду з часоў судовых працэсаў у Нюрнбергу і Токіо пасьля Другой сусьветнай вайны.
У гэты дзень нарадзіліся:
9 — Ціт Флавій Вэспасіян, рымскі імпэратар.
1828 — Эмэрык Чапскі, беларускі калекцыянэр і нумізмат.
1887 — Бернард Лоў Мантгомеры, брытанскі фэльдмаршал, кіраўнік брытанскімі войскамі ў Другой сусьветнай вайне.
1893 — Кастусь Езавітаў, дзяяч беларускага нацыянальнага адраджэньня, вайсковец і дыплямат БНР
1906 — беларускі пэдагог і мэмуарыст Янка Багдановіч
1938 — беларускі кінарэжысэр Вадзім Сукманаў. Ягоныя фільмы прысьвечаны Коласу, Маўру, Быкаву, Барадуліну. Зьняў Вадзім Сукманаў і фільм пра беларускую Вільню.
1942 — Марцін Скарсэзэ, амэрыканскі кінарэжысэр.
У гэты дзень памерлі:
1796 — Кацярына II, расейская імпэратрыца.
1917 — Агюст Радэн, францускі скульптар.
Цытата:
Грошы ня пахнуць.
Ціт Флавій Вэспасіян