Лінкі ўнівэрсальнага доступу

logo-print

Аматарскі футбольны клюб «Крумкачы» прабіўся ў найвышэйшую лігу


Футбалісты клюбу «Крумкачы» урэшце дабраліся да найвышэйшай лігі беларускага футбольнага чэмпіянату. Клюбу няма і двух гадоў, і праз свой імклівы посьпех ён стаў галоўнай інтрыгай беларускага чэмпіянату.

Сёньня «Крумкачы» гулялі з магілёўскім «Дняпром», чэмпіёнам і прызёрам беларускага першынства, некалі ўдзельнікам эўракубкаў. Перамога 2:0 на карысьць «Крумкачоў».

Падтрымаць «Крумкачоў» прыехала экс-кандыдатка на прэзыдэнта Тацяна Караткевіч.

Для выхаду ў найвышэйшую лігу іх задавальняла і нічыя.

«Крумкачы» нарадзіліся на форуме газэты «Прессбол». У 2011 годзе некалькі карыстальнікаў форуму выйшлі ў офлайн і стварылі аматарскую каманду. Тры гады яны гулялі ў менскай гарадзкой лізе Асацыяцыі аматарскага футболу і ў камандзе заўзятараў менскага «Дынама».

«Калі стваралі каманду, мы з братам хацелі знайсьці беларускую назву, — узгадвае Дзяніс Шунто. — Пачалі перабіраць розных жывёл. І „Крумкачы“ ўсім спадабаліся».

Назвай беларушчына не абмяжоўваецца — усе афішы сваіх гульняў «Крумкачы» афармляюць па-беларуску. Абяцаюць і свайго дыктара на хатнім стадыёне таксама навучыць беларускай мове.

Заснавальнікамі клюбу выступілі трое: Дзяніс Шунто, Васіль Глезаў і Ўладзіслаў Маяроўскі.

Свабода раней ужо пісала пра «Крумкачоў». Чытаць артыкул цалкам >>

ВІДЭА:

Паказаць камэнтары

XS
SM
MD
LG