Афіша:
Менск. Беларуская Хрысьціянская Дэмакратыя праводзіць устаноўчы сход Рэспубліканскага грамадзкага аб’яднаньня «Хрысьціянска-Дэмакратычны Рух». Пачатак а 11.00 па адрасе: вул. Шчорса, 1, гатэль «Камфорт», канфэрэнц-заля № 1.
Менск. Студэнцкае этнаграфічнае таварыства праводзіць майстар-клас па валяньні рукавіцаў з воўны. Заняткі праходзяць па адрасе: вул. Лібкнехта, 112; ад 13.30 да 17.00.
14 лістапада — Сусьветны дзень барацьбы з дыябэтам.
У гісторыі:
1812 — нарадзіўся Паўлюк Багрым, беларускі паэт.
1902 — нарадзіўся Міхась Машара, беларускі пісьменьнік і грамадзка-палітычны дзяяч.
1905 — нарадзіўся Міхась Васілёк, беларускі паэт.
1912 — Янка Золак, беларускі паэт.
1915 — у Вільні адкрылася першая беларуская пачатковая школа. Заснавала яе Таварыства дапамогі пацярпелым ад вайны. Маршалкам Таварыства быў Вацлаў Іваноўскі, а ягонымі намесьнікамі — Антон Луцкевіч і Вацлаў Ластоўскі.
1920 — пачаў працу Зьезд Случчыны. У яго складзе былі 107 дэлегатаў з навакольля Слуцку, а таксама некалькі прадстаўнікоў арміі генэрала Булак-Балаховіча. На зьезьдзе была абраная Рада Случчыны, у склад якой увайшлі Ўладзімер Пракулевіч (старшыня), Васіль Русак, Павал Жаўрыд і яшчэ 15 асобаў. Яе задачамі была арганізацыя грамадзянскага кіраваньня на Случчыне, а таксама арганізацыя абароны краю. Зьезд прыняў рэзалюцыю, якая абвяшчала ўладу Беларускай Народнай Рэспублікі ў Слуцку і навакольлях, і выказаў пратэст супраць бальшавісцкай акупацыі.
1926 — у Менску пачалася 1-я Беларуская акадэмічная канфэрэнцыя ў пытаньнях рэформы беларускага правапісу і азбукі.
У памяці:
2008 — памёр Генадзь Кісялёў, беларускі літаратуразнавец, архівіст.
2008 — памёр Аляксандар Дракахруст, беларускі рускамоўны паэт, перакладчык.
Цытата:
«Ціха... Ноч... Аксамітавы змрок...
Мы ў саду, пад кудраваю вішняй,
Перайшлі запаветны парог,
Насустрэчу нязнанаму вышлі.
І тады, ў гэту цёплую ноч,
Мне шаптала зялёнае вецьце,
Што пагляд васілёчкавых воч
Не дарыла нікому ты ў сьвеце.
Верыў я і жадаў яшчэ больш
Патануць у пяшчотах каханьня,
Піць, забыўшы мінулага боль,
Пацалункі да сіняга раньня.
Каб я мог, я б табе у касу
Уплясьці б хацеў нізанку зорак,
Ды зьнячэўку рассыпаў расу
Па мурожнай траве новы золак».
Янка Золак, «Успамін».