Лінкі ўнівэрсальнага доступу

Польскія візы можна будзе атрымаць ня толькі ў Менску, але і ў Баранавічах, Лідзе, Пінску


Міхал Хабрас і Прабуда Сен перад падпісаньнем пагадненьня
Міхал Хабрас і Прабуда Сен перад падпісаньнем пагадненьня

У васьмі гарадах Беларусі ў І квартале 2016 году запрацуюць польскія візавыя цэнтры.

Сёньня ў рамках дзелавога візыту ў Менск і Магілёў дэлегацыі польскіх аграрыяў адбылося падпісаньне дамовы на абслугоўваньне польскіх візавых цэнтраў.

Удзел у цырымоніі ўзялі Часовы павераны ў справах Польшчы ў Беларусі Міхал Хабрас і рэгіянальны ўпраўляючы міжнароднай кампаніі VFS Global у краінах СНД Прабуда Сен.

Як расказаў Міхал Харбас, плянуецца, што візавыя цэнтры запрацуюць да канца першага кварталу 2016 году, іх будзе восем і разьмесьцяцца яны ня толькі ў Менску і шэрагу абласных цэнтраў (Берасьце, Гомель, Горадня), а таксама ў Баранавічах, Лідзе і Пінску:

«Спадзяемся, што і колькасьць гэтых цэнтраў, і іх прапускная здольнасьць аблегчаць грамадзянам Беларусі працэс атрыманьня візаў. Мы ведаем, што праблема атрыманьня візаў вельмі хвалюе беларускае грамадзтва і хацелася б, каб пасьля сёньняшняга мерапрыемства гэтыя хваляваньні засталіся ў мінулым».

Дамова пра візавыя цэнтры замацаваная подпісамі
Дамова пра візавыя цэнтры замацаваная подпісамі

Патэнцыйных кліентаў, натуральна, цікавіць памер сэрвіснага збору, бо ў аналягічных цэнтрах іншых краінаў, якія ўжо працуюць у Беларусі, ён розьніцца. Прабуда Сен адказаў, што кошт плянуецца прывязаць да канкрэтнага эквіваленту ў эўравалюце: «Сэрвісны збор будзе складаць у эквіваленце 15 эўра, ён будзе здымацца ў тым ліку за біямэтрычныя дадзеныя чалавека».

Пакуль не разгалошваюцца адрасы, дзе менавіта будуць працаваць польскія візавыя цэнтры. Пры гэтым прадстаўнікі кампаніі-пасярэдніка запэўніваюць, што гэта будуць зручныя месцы ў цэнтральных раёнах пералічаных гарадоў: «Першым чынам трэба было падпісаць кантракт, а ўжо пасьля гэтага пачнецца вырашэньне тэхнічных пытаньняў», — зазначыў спадар Сен, дадаўшы, што сярод іншага ў рэгіёнах зьявяцца так патрэбныя новыя працоўныя месцы.

Прабуда Сен і Міхал Хабрас - абмен рукапацісканьнем
Прабуда Сен і Міхал Хабрас - абмен рукапацісканьнем

Чаму амбасада Польшчы абрала ў якасьці партнэра менавіта VFS Global? Спадар Хабрас кажа, што кампанія перамагла ў вострай канкурэнцыі:

«Адбыўся тэндэр згодна з нашай дзяржаўнай тэндэрнай працэдурай. Ён быў абвешчаны некалькі месяцаў таму, была створаная адмысловая камісія, якая цягам двух тыдняў прымала заяўкі. Усе пасьля прапановы былі разгледжаныя і экспэрты спыніліся на найбольш годнай. У іншых кампаній была магчымасьць абскардзіць вынікі тэндэру і на гэты момант уся працэдура ў нашай краіне завершаная. Сёньня мы маем пагадненьне з кампаніяй, якая прадставіла найлепшыя ўмовы».

Прабуда Сен (зьлева) і Міхал Хабрас
Прабуда Сен (зьлева) і Міхал Хабрас

VFS Global ужо мае досьвед працы ў візавай галіне, бо яшчэ раней пачала супрацоўнічаць зь візавымі цэнтрамі Літоўскай Рэспублікі. У сваю чаргу, Міхал Хабрас спадзяецца, што колькасьць грамадзянаў Беларусі, якія скарыстаюцца паслугамі польскіх візавых цэнтраў, будзе расьці:

Міхал Хабрас выступае перад дзелавой супольнасьцю
Міхал Хабрас выступае перад дзелавой супольнасьцю

«Усе нашы ўстановы, уключна з аддзяленьнямі амбасады кансуляту ў Менску, а таксама Генкансуляты ў Берасьці і Горадні, выдаюць парадку 400 тысяч візаў на год. Хочацца, каб гэтая колькасьць не зьмяншалася, а, хутчэй, павялічвалася. Пры гэтым варта падкрэсьліць, што рашэньне аб выдачы візы ў кожным выпадку прымае консул. Так што кансуляты, насуперак засьцярогам, без працы не застануцца».

Удзельнікі форуму сталі сьведкамі падпісаньня візавага дакумэнту
Удзельнікі форуму сталі сьведкамі падпісаньня візавага дакумэнту

Ня гледзячы на тое, што з улікам сэрвіснага збору віза для беларусаў стала яшчэ даражэйшай (адна з самых дарагіх у Эўропе), атрымаць яе цяпер значна прасьцей і, галоўнае, без выстойваньня шматгадзінных чэргаў ля кансулятаў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG