Лінкі ўнівэрсальнага доступу

«Мы не так багатыя, каб утрымліваць лішнюю колькасьць сілавых структур», — Лукашэнка


Аляксандар Лукашэнка

Аляксандар Лукашэнка

Улады Беларусі зьбіраюцца комплексна ацаніць сфэру нацыянальнай бясьпекі і вызначыцца з пэрспэктывамі праваахоўнай сыстэмы.

Пра гэта сёньня заявіў прэзыдэнт Аляксандар Лукашэнка на нарадзе па пытаньнях разьвіцьця дзяржаўных органаў сыстэмы забесьпячэньня нацыянальнай бясьпекі, — перадае БЕЛТА.

Лукашэнка падкрэсьліў, што гаворка ідзе пра тое, наколькі эфэктыўна сыстэма бясьпекі зможа процідзейнічаць сёньняшнім выклікам, наколькі сілавікі гатовыя да розных варыянтаў разьвіцьця сытуацыі ў сьвеце, а таксама ці здольныя яны рэальна спрагназаваць і прадухіліць надыход магчымых нэгатыўных наступстваў:

«Для гэтага кожнаму ведамству неабходна ня толькі эфэктыўна вырашаць задачы, якія стаяць перад ім, але і мець глыбока прадуманую стратэгію сваёй дзейнасьці», — сказаў Лукашэнка.

Паводле ягоных словаў, у першую чаргу кіраўнікі сілавых ведамстваў павінны бачыць галоўныя напрамкі разьвіцьця на бліжэйшую і доўгатэрміновую пэрспэктыву.

«Мы не такія багатыя, каб утрымліваць лішнюю колькасьць сілавых структур. У той жа час і спрашчэньнем займацца нельга. У адваротным выпадку можна даскарачацца да таго, што ў нас сыстэма будзе, але яна акажацца непрацаздольнай», — перасьцярог Аляксандар Лукашэнка.

Таксама ён адзначыў, што ня мае намеру фармальна, аўтаматам падпісваць ўказы аб прызначэньні чальцоў ураду.

Цяпер урад у сувязі зь мінулымі прэзыдэнцкімі выбарамі ў адстаўцы, і кіраўнік дзяржавы павінен правесьці кадравыя прызначэньні.

Паказаць камэнтары

XS
SM
MD
LG