Лінкі ўнівэрсальнага доступу

logo-print

Праваабаронцу Андрэя Бандарэнку пераводзяць у магілёўскую турму


Андрэй Бандарэнка, архіўнае фота

Андрэй Бандарэнка, архіўнае фота

Пра гэта вязень шклоўскай калёніі Андрэй Бандарэнка паведаміў свайму бацьку Валеру Бандарэнку ў лісьце з ПКТ — памяшканьня камэрнага тыпу, куды яго зьмясьцілі за парушэньні, якія ён лічыць штучна створанымі.

«У ПКТ мяне зьмясьцілі на 2 месяцы і, паводле слоў кіраўніцтва, за гэты час мяне перавядуць на турэмны рэжым. Наколькі я разумею — у Магілёў. Да гэтага яшчэ мусіць быць камісія і суд, бо паводле закону на турэмны рэжым пераводзяць па вызначэньні суду», — напісаў Андрэй Бандарэнка.

Вязень паведаміў, што раней разьлічваў на амністыю, якая была прымеркаваная да угодкаў Перамогі, але пасьля таго, як яго пакаралі карцэрам і зрабілі зь яго злоснага парушальніка рэжыму, ён зразумеў, што ня можа разьлічваць ня толькі на гэтую, але і на будучую амністыю.

«Шанцаў і на будучую амністыю, калі прымуць у 2016 годзе, таксама нуль. Абавязкова знойдуць „пыл“ у камэры ці гузік ня будзе зашпілены», — папярэдзіў бацьку Андрэй Бандарэнка. Вязень мяркуе, што яму давядзецца да канца тэрміну быць ў турме.

Ліст Андрэя Бандарэнкі бацьку

Ліст Андрэя Бандарэнкі бацьку

Тым часам на волі працягваецца змаганьне за тое, каб адміністрацыя калёніі спыніла ціск на Андрэя Бандарэнку, а ў рэшце ён быў вызвалены. 4 лістапада ў офісе БНФ сабраўся грамадзкі камітэт салідарнасьці з Андрэем Бандарэнкам ў складзе праваабаронцаў, палітыкаў і былых палітвязьняў. Актывісты прынялі рашэньне зьвярнуцца да праваабаронцаў сьвету з заклікам прызнаць Андрэя Бандарэнку палітвязьнем на той падставе, што ўлады Беларусі кінулі яго ў вязьніцу з палітычных прычын.

Камітэт салідарнасьці з Андрэем Бандарэнкам абмяркоўвае зварот да праваабаронцаў сьвету

Камітэт салідарнасьці з Андрэем Бандарэнкам абмяркоўвае зварот да праваабаронцаў сьвету

Чаму, на думку сяброў камітэту салідарнасьці, варта лічыць, што з Бандарэнкам улады расквіталіся за ягоную праваабарончую дзейнасьць? Актывісты падрыхтавалі шэраг аргумэнтаў, якія пералічаць у сваім звароце. Сярод іх тое, што Андрэй Бандрэнка змагаўся за правы простых вязьняў, і дзякуючы ягоным намаганьням стала вядома пра ціск і катаваньні ў Глыбоцкай ды іншых калёніях, у пастарунках Ленінскага РУУС Менску і горада Ліды. Да арышту Андрэй Бандарэнка пачаў працу над антыкарупцыйным праектам, а таксама ён асабіста склаў сьпісы кіраўнікоў калёній, якіх лічыў вартымі патрапленьня пад санкцыі Эўразьвязу. Справу аб злосным хуліганстве, якая стала падставай да асуджэньня Андрэя Бандарэнкі на 3 гады зьняволеньня, сябры камітэту салідарнасьці лічаць сфабрыкаванай, а суд над Бандарэнкам несправядлівым.

Валер Бандарэнка

Валер Бандарэнка

Дэпартамэнт выкананьня пакараньняў па Магілёўскай вобласьці днямі даслаў Валеру Бандарэнку адказ на ягоную скаргу на тое, што ягоны сын Андрэй Бандарэнка стаў ахвярай свавольства ахоўнікаў і адміністрацыі калёніі. «Фактаў ціску, фізычнага і маральнага ўзьдзеяньня, а таксама перадузятага стаўленьня з боку супрацоўнікаў Папраўчай калёніі № 17 у адносінах да Андрэя Бандарэнкі ня выяўлена», — паведаміў кіраўнік абласной управы У. Скамарох. Паводле міліцыянта, Андрэй Бандарэнка быў пакараны карцэрам і зьмяшчэньнем у ПКТ паводле закону за сапраўдныя парушэньні рэжыму.

Камітэт салідарнасьці лічыць, што варта прызнаць палітвязьнем таксама і Міхаіла Жамчужнага, праваабаронцу, аднаго з заснавальнікаў арганізацыі «Плятформа», які нядаўна быў асуджаны на 6 з паловай гадоў калёніі і пачаў адбываць свой тэрмін у Навасадах Барысаўскага раёну.

XS
SM
MD
LG