Лінкі ўнівэрсальнага доступу

Баранавічы: дырэктарку крамы, дзе працаваў актывіст Грык, пакаралі штрафам


Рыгор Грык у баранавіцкім судзе

Рыгор Грык у баранавіцкім судзе

Былую начальніцу грамадзкага актывіста Рыгора Грыка з баранавіцкай крамы «МАRT INN» пакаралі штрафам. Рыгор Грык давёў суду, што начальніца яго ўдарыла.

Як распавёў спадар Грык, канфлікт з дырэктаркай здарыўся 24 верасьня, калі актывіст прыйшоў на працу ў паласатай вопратцы, стылізаванай пад канцлягерную — на знак пратэсту супраць таго, што яму не выдаюць працоўную робу.

Тады краму зачынілі, на Грыка выклікалі міліцыянтаў, у гэты ж дзень актывіст быў звольнены з працы.

Дырэктарка крамы Вольга Борыс напісала заяву ў міліцыю, што Грык у часе свайго пэрформансу ў канцлягернай вопратцы брыдкасловіў. 28 кастрычніка Баранавіцкі суд прысудзіў актывісту 30 базавых (5,4 мільёна рублёў) штрафу за брыдкаслоўе і па другой справе, за правядзеньне масавай акцыі.

Пасьля інцыдэнту ў краме Рыгор Грык напісаў заяву ў міліцыю, што дырэктарка ўдарыла яго, калі выштурхоўвала з гандлёвай залі.

У судзе Вольга Борыс адмаўляла, што біла Грыка, распавядала, што проста прасіла яго пераапрануцца, бо Грык «шакаваў наведнікаў» сваёй канцлягернай адзежай.

Суд запытваў запісы з камэраў відэаназіраньня з крамы, каб спраўдзіць, ці меў месца інцыдэнт, але запісаў гэтых не аказалася.

У выніку Вольгу Борыс пакаралі штрафам у 10 базавых велічыняў (1,8 мільёна рублёў). Рашэньне яшчэ можа быць абскарджана.

Рыгор Грык пасьля суду распавёў Свабодзе, што задаволены перамогай:

«Асабліва пасьля таго, як мяне аштрафавалі па яе заяве аб брыдкаслоўі, чаго я не рабіў. Цяпер лік 1:1. Толькі хай бы ёй таксама 30 базавых далі, як і мне», — сказаў Рыгор Грык.

XS
SM
MD
LG