Лінкі ўнівэрсальнага доступу

Былыя вязьні «амэрыканкі» пазналі «выкрывальніка» КДБ і апазыцыі Міхневіча


Васіль Міхневіч

Васіль Міхневіч

Зьміцер Бандарэнка кажа, што Васіль Міхневіч дапамог адміністрацыі СІЗА пасадзіць яго ў карцэр, дзе яго прыкавалі ланцугом. Анатоль Лябедзька пазнаў у ім ахвяру вайны паміж МУС і КДБ.

Расповед былога падпалкоўніка міліцыі Васіля Міхневіча пра арыштаваных за Плошчу ў 2010 годзе апазыцыянэраў пракамэнтаваў Дзьмітры Бандарэнка, актывіст «Эўрапейскай Беларусі», сябра выбарчага штабу экс-кандыдата на прэзыдэнта Андрэя Саньнікава, былы палітвязень, які цяпер жыве ў Польшчы.

Паводле Зьмітра Бандарэнкі, з Васілём Міхневічам ён сядзеў у 13-й камэры «амэрыканкі» ўсяго 4 дні, і скончылася для яго гэтае суседзтва карцэрам. Вось што сказаў Зьміцер Бандарэнка пра Васіля Міхневіча.

Зьміцер Бандарэнка

Зьміцер Бандарэнка

«Васіль Міхневіч у сваім інтэрвію літоўскім мэдыям сьцьвярджае, што сядзеў са мной у адной камэры і аказаў мне моцную падтрымку ў свой час. Хачу сказаць, што сапраўды я сядзеў зь ім у СІЗА КДБ, у камэры № 13 — гэтая камэра была створаная для „прэсаваньня“ вязьняў. Мяне перакінулі зь іншай камэры ў гэтую камэру, дзе знаходзіўся гэты спадар Міхневіч. Магу сказаць дакладна, што гэты чалавек дапамог адміністрацыі СІЗА адправіць мяне ў карцэр, дзе першыя суткі мяне трымалі на ланцугу, прыкаваным да сьцяны. Гэты чалавек — былы камандзір аднаго з падразьдзяленьняў спэцназу ўнутраных войскаў, потым працаваў падпалкоўнікам у ОБЭП (аддзел барацьбы з эканамічнымі злачынствамі) гораду Менску. Цяпер ён выехаў за мяжу і дзіўным чынам стаўся экспэртам па беларускай апазыцыі. Вось я хачу папярэдзіць усіх людзей, што гэты чалавек вельмі небясьпечны, каб яны былі зь ім вельмі асьцярожныя ў кантактах».

Сяргей Вазьняк

Сяргей Вазьняк

14 кастрычніка былы вязень ізалятара КДБ Сяргей Вазьняк, які сядзеў разам зь Міхневічам, сказаў, што таго абвінавачвалі ў карупцыі праз службовыя злоўжываньні.

«Пры будаўніцтве дому нейкія блёкі, кран... Нешта такое было, але дакладна ня памятаю», — сказаў Сяргей Вазьняк.

Другі сукамэрнік Васіля Міхневіча — Алесь Кіркевіч згадаў пра абвінавачваньне былога міліцыянта гэтак:

Алесь Кіркевіч

Алесь Кіркевіч

«Казаў, што адносна нейкага чалавека яны пры затрыманьні ці то ўжылі сілу, ці нешта такое. Але пра карупцыю не ішла гаворка».

Што вядома Зьмітру Бандарэнку пра тое, у чым Васіля Міхневіча абвінавачвалі сьледчыя, калі ён сядзеў у «амэрыканцы»?

«Магу сказаць зь ягоных словаў, што яго абвінавачвалі ў перавышэньні службовых паўнамоцтваў, а дакладней — што зламалі пры затрыманьні камусьці руку», — сказаў Зьміцер Бандарэнка.

Алесь Кіркевіч таксама згадаў, што бачыў Васіля Міхневіча ў вельмі дрэнным фізычным стане, які патлумачыў тым, што вязьня часта зьмяшчалі ў карцэр з-за ягонага змаганьня за свае правы. У якім стане быў Васіль Міхневіч тады, калі зь ім бачыўся Зьміцер Бандарэнка?

«Ня ведаю, я бачыў яго ў нармальным стане. Пасьля... Не, больш камэнтаваць ня буду. Проста гэта ня мае ніякага дачыненьня да рэчаіснасьці. Чалавек можа выглядаць гэтак, потым гэтак, за месяц набраць вагу і выглядаць інакш».

Зьміцер Бандарэнка мяркуе, што Васіль Міхневіч наўмысна даводзіць усім, што «ўся апазыцыя працуе на КДБ, акрамя Пазьняка», каб скампрамэтаваць апазыцыю ў вачах грамадзкасьці.

Знайсьці для камэнтару самога Васіля Міхневіча пакуль не ўдаецца.

«Свабода» зьвярнулася да лідэра АГП Анатоля Лябедзькі, які 3,5 месяца адбыў у «амэрыканцы» разам зь іншымі арыштаванымі за Плошчу і пазьней напісаў пра тыя падзеі кнігу «108 дзён у вязьніцы КДБ». Ці давялося спадару Лябедзьку сутыкацца ў ізалятары з Васілём Міхневічам і як ён ставіцца да закідаў былога міліцыянта адносна супрацоўніцтва лідэраў апазыцыі з КДБ?

Анатоль Лябедзька:

Анатоль Лябедзька

Анатоль Лябедзька

«Кнігу я пісаў штодзённа пасьля „амэрыканкі“, і таму можна лічыць, што гэта амаль адбітак у люстэрку тых падзей, што былі са мной. Калі ж тое, што было, абмяркоўваюць праз 5 год, гэта ўжо не адбітак. Нешта шмат наслойваецца — кантакты, пазьнейшы досьвед. Таму, найперш, я б спакойна ставіўся да гэтых успамінаў. А што да агульных высноваў, дык яны вартыя ўвагі, толькі калі падмацаваныя фактамі.

Але што да гэтага Васіля, дык я пра яго чуў яшчэ тады, у „амэрыканцы“. Мне распавядаў мой сукамэрнік, што ёсьць такі Васіль, былы міліцыянт, і што ён ахвяра вайны паміж сілавымі структурамі. Што МУС увесь час у стане вайны з КДБ, КДБ — з пракуратурай, і ўсё залежыць ад таго, хто ў іх начальнік і ці ў стане ён абараняць сваіх. Прыкладам, што калі нейкі міліцыянт зьяўляецца ў „амэрыканцы“, дык нехта з супрацоўнікаў КДБ сядзіць на „Валадарцы“. Гэтак мне казаў арыштант, які сам меў дачыненьне да сілавікоў. І пра Васіля яшчэ казалі, што ён падпалкоўнік і што „буяніць“. Маўляў, ня толькі вось ты такі, ня толькі вашы палітычныя, але і ён таксама нешта такое робіць — супраціўляецца гэтым лягерным парадкам у ізалятары.

Што да словаў пра апазыцыю ўвогуле — дык я бачыў абсалютна розных людзей. Мне распавядалі пра палітычных, хто быў зломлены ўжо празь некалькі дзён, і пра тых, хто вытрымаў. Вось я бачыў таго ж Аліневіча, таго ж Кіркевіча, якія са мной сядзелі, і скажу, што і праз тры месяцы яны захоўвалі чалавечае аблічча і стрыжань. І ні на якае супрацоўніцтва ні з кім не ішлі — гэта факт. То бок людзі розныя».

Паказаць камэнтары

XS
SM
MD
LG