«Ці давяраеце вы афіцыйным вынікам выбараў, абвешчаным уладамі? Ці верыце, што галасы людзей падлічылі сумленна? Чаму так лічыце?» На гэтае пытаньне адказваюць жыхары Гомеля.
Мужчына ва ўзросьце: «На семдзесят пяць адсоткаў давяраю, і ня больш».
Назіральніца: «Несправядліва. Першы раз назірала — і ў мяне быў шок. Лічылі, можна сказаць, па галовах — датэрмінова і ў асноўны дзень. І шэсьцьсот чалавек не заўважылі. Яны прабеглі паўз нас, а мы не заўважылі».
Малады бацька: «Афіцыйныя ж вынікі яшчэ не называлі. Напэўна ж, складана штосьці зрабіць, бо былі назіральнікі зь іншых краінаў».
Працаўніца: «Ня чула афіцыйных вынікаў. Была на працы, ня ведаю».
Мужчына сярэдніх гадоў: «Не лічу, што сумленна. Пытаўся ў людзей, у асноўным ні за кога — закрэсьлівалі ўсіх. Пяцьдзясят на пяцьдзясят давяраю».
Пэнсіянэрка: «Я, напрыклад, давяраю. Навошта падманваць? Кожны ж ведае, за каго галасуе. Мне так падаецца».
Пэнсіянэр: «Думаю, што мала падманваюць. Урэшце, павінны хоць калісьці праўду казаць».
Назіральніца сталага ўзросту: «Ні ў якім разе не давяраю. Пераканаліся, што гэта няпраўда. Ні на хвіліну не сыходзілі з участку, вялі акуратна падлік, а ў выніку атрымалася, што мы не заўважылі даволі вялікую колькасьць выбарцаў, якія нібыта прыйшлі на выбары. Актыўнасьць сёлетніх выбараў больш сьціплая, чым на папярэдніх. Выбары сфальшаваныя, лічбы былі запраграмаваныя».
Студэнт: «Падтасаваць цалкам маглі, бо ў нас могуць быць несумленныя выбары. Гэта ніякі не сакрэт — так лічыць большасьць народу Беларусі. І ня толькі. Людзі ня хочуць дзейнага прэзыдэнта, але ж, наколькі я ведаю, людзей прымушаюць галасаваць за... ня будзем называць прозьвішча».
Маладая жанчына: «Не, не падтасоўвалі. Думаю, што ўсе разумеюць сытуацыю ў Беларусі. З Украінай гэта таксама зьвязана. Думаю, што ўсё законна, не падтасавана».
Былая настаўніца: «Жартуеце ці сьмеяцеся зь мяне? Трэба ж дагадзіць галоўнаму вось і дагаджаюць. Як хацелі, так і рабілі».
