Лінкі ўнівэрсальнага доступу

Віцебшчына: на выбарчых участках было малалюдна, але выбары адбыліся ўжо апоўдні


Улады сьцьвярджаюць, што амаль 40% выбаршчыкаў Віцебскай вобласьці прыйшлі на ўчасткі падчас датэрміновага галасаваньня. Гэта — афіцыйная лічба Цэнтравыбаркаму. За кошт чаго дасягнулі такіх высокіх паказьнікаў?

Назіральнік ад Партыі левых «Справядлівы сьвет» Вадзім Кузьмін перакананы, што сваю ролю адыграў ціск на студэнтаў ВНУ. На ўчастку № 47 Першамайскага раёну, які месьціцца ў Тэхналягічным унівэрсытэце, цягам першай гадзіны дня выбараў не прагаласавала і дзясятка чалавек, кажа назіральнік:

«Было чалавек 6 ці ўвогуле 4. Няма народу. Вось у першы дзень, калі студэнты цэлымі групамі ішлі, было 200 чалавек. І ў наступныя — па 170, па 150 чалавек. У суботу, калі студэнты паехалі дадому, было ўжо 40 зь нечым. А сёньня ўвогуле мала, мала народу».

Людзей на ўчастках было небагата, хоць заваблівалі і буфэтам з гарэлкай, і канцэртам мастацкай самадзейнасьці. Самадзейным артыстам, кажа спадар Кузьмін, выступаць практычна не было перад кім.

Назіральнік ад Партыі левых «Справядлівы сьвет» Вадзім Кузьмін

Назіральнік ад Партыі левых «Справядлівы сьвет» Вадзім Кузьмін

Як атрымалася такая высокая яўка — пытаньне адкрытае. Выбаршчыкі знайшлі на ўчастку № 61 Першамайскага раёну дужа незвычайную рэч — паперку з подпісам старшыні камісіі і аднаго з чальцоў. Якраз такімі паперкамі заклейвалі на ноч скрыні падчас датэрміновага галасаваньня. Назаўтра шчыліну для бюлетэняў мусілі адчыняць зноў, разрываючы паперку-«плёмбу». Але гэтая паперка засталася цэлай. Магчыма, яна «запасная», мяркуе назіральнік Вадзім Кузьмін. На той выпадак, калі трэба замяніць парваную паперку на непашкоджаную. Спадар Кузьмін прапанаваў таксама ставіць і свой подпіс, каб прадухіліць любыя маніпуляцыі са скрынямі ўночы. Аднак яму ні разу не далі на гэта згоды. Дарэчы, участак № 61 — той самы, дзе пасьля першага дня галасаваньня «знайшліся» 100 лішніх бюлетэняў.

Знаходка выбаршчыкаў участку № 61

Знаходка выбаршчыкаў участку № 61

Калі верыць афіцыйным паведамленьням БЕЛТА, у дзень выбараў сцэнічныя пляцоўкі гарадоў і раёнаў вобласьці павінны пацяшаць публіку яркімі і разнаплянавымі канцэртна-забаўляльнымі праграмамі. Аднак у Віцебску ўсё ціха, і на цэнтральных сцэнічных пляцоўках пуста. Затое даволі людна ў крамах. Паводле чутак, напярэдадні выбараў на ўсіх прадпрыемствах выдалі заробкі — нават на тых, якія завінаваціліся перад работнікамі не за адзін месяц.

Пустая сцэна на плошчы Свабоды ў Віцебску

Пустая сцэна на плошчы Свабоды ў Віцебску

Падчас выбараў у рэгіёне выкарыстоўваецца 3816 скрыняў для галасаваньня, зь якіх палова (1987) — празрыстыя. Назіральніца Алена Шабуня цьвердзіць, што гэта дазволіла ёй зафіксаваць фальсыфікацыі. Сфатаграфаваўшы скрыню ўчора ўвечары і сёньня ўраньні, яна напісала заяву ў пракуратуру. Бо перакананая: на фатаздымках добра відаць, што бюлетэні раніцай ляжаць зусім ня так, як іх пакідалі вечарам.

Назіральніцы патлумачылі, што яе заяву будзе вывучаць Сьледчы камітэт.

На закрытым участку — у гарадзкім шпіталі № 2 — меўся б прагаласаваць вядомы віцебскі апазыцыянэр Барыс Хамайда. Але ён — сталы прыхільнік байкоту, і гэты свой прынцып ён вытрымаў, адмовіўшыся ісьці на выбары. Са шпіталя яшчэ ня выгналі і нават абеду не пазбавілі, жартуе спадар Барыс:

«Я думаў, што да хворых будуць прыходзіць са скрыняй у палату. Але ж не — сказалі, каб падрыхтавалі пашпарты ды ішлі галасаваць самі. Я сказаў, што галасаваць ня буду. Яны спыталі маё прозьвішча, запісалі яго. У нашай палаце я такі адзін. А колькі нас ва ўсім шпіталі, я ня ведаю. Але з размоваў тут паміж хворымі я зразумеў, што Лукашэнка ня дужа ў пашане, канечне».

Многія віцябляне вызначаюць гэтую выбарчую кампанію як «дужа сумную». Людзі ня вераць, што іхны голас можа нейкім чынам паўплываць на вынік выбараў. Мала вераць кандыдатам, прычым усім чатыром. І калі гавораць пра заўтрашні дзень, то не пра тое, што можа зьмяніцца прэзыдэнт краіны. А хіба пра трывогу, што падвысяцца кошты ў крамах, адключаць цяпло ў кватэрах ці здарыцца яшчэ нешта такое, што не паверне іхнае жыцьцё да лепшага.

XS
SM
MD
LG