Як заяўляюць улады Газы, ахвярамі авіяўдару сталі два чалавекі, чацьвёра параненыя, яшчэ трое, як мяркуецца, знаходзяцца пад заваламі дома. Паводле інфармацыі лекараў, загінулі цяжарная жанчына і яе трохгадовая дачка, паведамляе ВВС.
Прадстаўнікі ізраільскай арміі паведамілі, што ваенна-паветраныя сілы атакавалі два склады са зброяй, якія належаць руху ХАМАС, у адказ на запуск двух ракет палестынцамі ў пятніцу і суботу. Адна ракета ўзарвалася на ізраільскай тэрыторыі, не прычыніўшы нікому шкоды, іншая была зьбітая ізраільскай сыстэмай ПРА.
Раней прэм’ер-міністар Ізраіля Біньямін Нэтаньяху аб’явіў мабілізацыю сотняў паліцэйскіх рэзэрвістаў з-за абвастрэньня адносінаў паміж ізраільцянамі і палестынцамі.
Рэзэрвісты пачнуць службу ў нядзелю, каб аднавіць парадак у Ерусаліме і па ўсёй краіне, паведаміў Нэтаньяху.
У суботу ізраільская паліцыя застрэліла двух палестынскіх юнакоў падчас сутыкненьняў недалёка ад мяжы з сэктарам Газа.
Сутыкненьні паміж палестынцамі і ізраільцянамі пачасьціліся ў апошнія тыдні. У мінулую нядзелю паліцыя Ізраіля абмежавала для палестынцаў доступ у Стары горад Ерусаліма, дзе знаходзіцца, у прыватнасьці, сьвяшчэнная для мусульман мячэць Аль-Акса.
Гэтаму папярэднічалі два кровапралітныя напады на мінакоў-ізраільцян. У адным выпадку двое ізраільцян былі зарэзаныя да сьмерці. Рашэньне закрыць Стары горад выклікала беспарадкі сярод палестынцаў.