Лінкі ўнівэрсальнага доступу

Зь Менску ў Вільню — за дзьве гадзіны


Порт у Клайпедзе

Порт у Клайпедзе

Значэньне клайпедзкага порту для эканомікі Беларусі нашмат павялічыцца пасьля таго, як запрацуе беспрэцэдэнтны праект «Новы шаўковы шлях».

Калі цяпер порт Клайпеды пераважна выкарыстоўваецца дзеля транзыту беларускіх грузаў, найперш калійных угнаеньняў, у далёкія краіны сьвету, то пасьля запуску «Новага шаўковага шляху» кітайскія грузы для Беларусі будуць морам перавозіцца ў Клайпеду, а адтуль чыгункай у Беларусь.

Пра такія магчымасьці сёньня шмат гаварылі ўдзельнікі Беларуска-літоўскага транспартнага форуму, які пачаўся ў Менску.

Стасіс Гудваліс, намесьнік генэральнага дырэктара літоўскай чыгункі, заявіў, што літоўцы хочуць паглыбіць акваторыю порту да 17 мэтраў. Гэта дасьць магчымасьць прымаць буйныя караблі, а значыць — зьменшыць транспартныя выдаткі.

Марскі шлях дастаўкі грузаў — самы танны, але займае адносна шмат часу. Таму разглядаюць і магчымасьць чыгуначных перавозак зь Літвы ў Кітай. Літоўцы прапануюць два маршруты, і абодва не абмінаюць Беларусь.

На сёньняшняй сустрэчы закраналася і праблема пасажырскіх перавозак. Першы намесьнік начальніка Беларускай чыгункі Ўладзімір Міхайлюк заявіў, што цяпер чыгуначнікі абедзьвюх краін маюць магчымасьць скараціць шлях паездкі зь Менску ў Вільню і наадварот зь дзьвюх з паловай гадзін да дзьвюх гадзін роўна. Дзеля гэтага трэба электрыфікаваць адзін з адрэзкаў шляху.

XS
SM
MD
LG