Лінкі ўнівэрсальнага доступу

Найбольшая колькасьць назіральнікаў — у «Права выбару — 2015»


Падчас прэзыдэнцкіх выбараў 2010 году. Ілюстрацыйнае фота
Падчас прэзыдэнцкіх выбараў 2010 году. Ілюстрацыйнае фота

Найбольшую колькасьць назіральнікаў ад дэмакратычных арганізацыяў Беларусі на галасаваньні падчас прэзыдэнцкіх выбараў выставіць грамадзкая кампанія «Права выбару — 2015». 1694 актывісты будуць весьці назіраньне ад 6 па 11 кастрычніка ўключна на 741 выбарчым участку. Прычым сёлета гэта будуць актыўныя назіральнікі — падкрэсьлілі сёньня сустаршыні «Права выбару — 2015» на сваёй прэсавай канфэрэнцыі.

Кожны з назіральнікаў прайшоў курс навучаньня і здаў іспыт. Каардынатары кампаніі ўпэўненыя, што гэтыя людзі ведаюць выбарчае заканадаўства і практыку яго прымяненьня лепей за бальшыню сябраў выбарчых камісіяў. «Таму яны гатовыя да актыўнага назіраньня», — заявіў Дзяніс Садоўскі:

Дзяніс Садоўскі
Дзяніс Садоўскі

«Гэта ня проста фіксацыя. Але, наколькі нам дазваляе выбарчае заканадаўства, гэта і супрацьдзеяньне тым фальсыфікацыям, тым парушэньням, якія плянуюцца і будуць на выбарчых участках. Яны выцякаюць з таго, што, пачынаючы ад фармаваньня выбарчых камісіяў, улада паказвае — ніякай лібэралізацыі выбараў і адкрытага падліку галасоў яна не плянуе.

Мы пакрыем назіраньнем больш за 100 населеных пунктаў. Гэта — Менск, усе абласныя гарады, бальшыня раённых цэнтраў і частка сельскай мясцовасьці. Наша назіраньне арганізавана так, што яго вынікі можна транспаніраваць і на нацыянальны ўзровень».

Каардынатар Алесь Сілкоў паведаміў, што грамадзкія назіральнікі пачынаюць сваю працу сёньня, і патлумачыў, чаму кампанія «Права выбару — 2015» ня здолела знайсьці больш актывістаў:

Алесь Сілкоў
Алесь Сілкоў

«Мы маглі б закрыць значна большую колькасьць участкаў. Але ж ёсьць датэрміновае галасаваньне. І дзе знайсьці шмат людзей, якія могуць кінуць працу на пяць дзён?! А наша патрабаваньне вельмі жорсткае — на ўчастку, за якім мы назіраем, назіральнік павінен быць увесь час. Калі зь нейкай нечаканай прычыны на дадзеным участку няма нашага чалавека, мы гэты ўчастак ня ўводзім у агульную базу і не карыстаемся лічбамі зь яго.

Кожны з нашых назіральнікаў, які будзе акрэдытоўвацца на выбарчым участку, перадасьць старшыні камісіі нашу прапанову аб адкрытым падліку галасоў. Згодна зь першай часткай артыкула 13 Выбарчага кодэксу выбары ў Беларусі праходзяць адкрыта і галосна. І таму мы просім, каб усе сябры ўчастковай камісіі, а таксама назіральнікі бачылі кожны бюлетэнь. Калі ж гэтага ня будзе, тады нашы назіральнікі могуць з поўнай упэўненасьцю напісаць, што вынікі галасаваньня на гэтым канкрэтным участку ня маюць юрыдычнай моцы, бо іх ніхто ня бачыў».

Галоўнае, на што арыентаваныя назіральнікі ад «Права выбару — 2015», — яўка выбарцаў і падлік бюлетэняў, — сказаў Дзяніс Садоўскі:

«Мы будзем штодня даваць параўнальную інфармацыю — яўку, якую паказвае выбарчая камісія, і нашу лічбу за гэты ж час. І будзе магчымасьць штодня параўнаць рэальную яўку на нашых участках зь сярэдняй па краіне, якую абвяшчае Цэнтравыбаркам.

І Лідзія Ярмошына, і Аляксандар Лукашэнка ўжо заяўлялі, што падлік галасоў будзе празрысты. Вядома, яны ўкладаюць у гэтае слова нейкі іншы сэнс, чым гэта павінна быць згодна зь міжнароднымі нормамі і агульным разуменьнем. Але і гэтаму этапу мы будзем надаваць шмат увагі — ці будзе празрысты падлік галасоў, ці не?»

Сёньняшняя прамежкавая справаздача «Права выбару — 2015» стала ўжо чацьвёртай. Яна ахоплівае этап перадвыбарчай агітацыі. Паводле экспэртаў, пасьля таго як фінансаваньне выбарчай кампаніі стала выключна дзяржаўным, колькасьць улётак, плякатаў ды іншых агітацыйных сродкаў значна зьменшылася. Пра гэта ж казаў сёньня і старшыня партыі БНФ, якая ўваходзіць у кампанію «Права выбару — 2015», Аляксей Янукевіч:

Аляксей Янукевіч
Аляксей Янукевіч

«Раней у нас не было нармальнага падліку галасоў, цяпер няма і нармальнай агітацыі. Прычым няма агітацыі і абмеркаваньня асобаў кандыдатаў і няма агітацыі і абмеркаваньня важных, сур’ёзных тэмаў, якія існуюць сёньня ў грамадзтве. Гэта вельмі добра бачна на тэме расейкай вайсковай базы. Яна вельмі балючая. І мы бачым, што памкненьні грамадзянаў абмеркаваць праграмы кандыдатаў і гэтую тэму канкрэтна натыкаюцца на супрацьдзеяньне ўладаў.

Мы бачым, што сёлета ўлада зьвяла ўсю рознабаковую перадвыбарчую агітацыю выключна да агітацыі за ўдзел у выбарах, за прыход на выбарчыя ўчасткі. Гэта асноўнае пасланьне, якое застаецца ў грамадзтве».

У кампанію «Права выбару — 2015» уваходзяць восем палітычных структураў. Гэта — партыі БНФ і БСДП (Грамада), Беларуская партыя «Зялёныя», аргкамітэты па стварэньні партыяў Беларускай хрысьціянскай дэмакратыі і Свабоды і прагрэсу, рух «За свабоду», кампанія «Гавары праўду», прафсаюз радыёэлектроннай прамысловасьці.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG