Лінкі ўнівэрсальнага доступу

«Лукашэнка проста добры чалавек». Як у Магілёве агітуюць за дзейнага кіраўніка


Першы пікет за час правядзеньня агітацыйнага этапу перадвыбарчай прэзыдэнцкай кампаніі выставілі ў Магілёве. У сквэры 40-годзьдзя Перамогі актывісты БРСМ пераконвалі магілёўцаў, каб на выбарах яны аддалі свой голас за Аляксандра Лукашэнку.

Яго вялікі партрэт зь беларускамоўным надпісам «За будучыню незалежнай Беларусі» вылучаўся ў мітусьні мінакоў, якія наведалі ў сквэры ці то кірмаш, ці то выставу народнай творчасьці. Побач хор сьпяваў беларускія песьні.

На просьбу журналіста апавесьці пра прэтэндэнта на вышэйшую дзяржаўную пасаду краіны Аляксандра Лукашэнку дзяўчаты ў бэйсболках з надпісам «БРСМ» разгубіліся.

«Ён добры чалавек. Не дапускае таго, што цяпер адбываецца ва Ўкраіне. Ён усё трымае ў парадку», — адказала адна зь дзяўчат і тут жа дадала:

«Мы наагул выступаем за мір, за свабодную краіну і, каб у нас было ўсё добра. Хочам, каб да нас падыходзілі людзі і пакідалі свае пажаданьні для тых хто сёлета будзе ўпершыню галасаваць», — зазначыла суразмоўніца.

За час пакуль журналіст гутарыў зь пікетоўцамі да стала з надпісам «Белая Русь» падышло чацьвёра чалавек. Усе як выявілася прыхільнікі Аляксандра Лукашэнкі.

«Вядома ж хацелася б, каб ён заставаўся нашым прэзыдэнтам і, каб мы жылі ў квітнеючай Беларусі. Тым хто будзе галасаваць упершыню я пажадала, каб яны зрабілі правільны выбар», — зазначала жанчына сталага веку, якой за напісанае пажаданьне пікетоўцы прэзэнтавалі перадвыбарчую праграму Аляксандра Лукаўшэнкі на расейскай мове.

Калі будуць нейкія перамены, дык толькі да лепшага. Але я б нічога не жадала лепшага. Няхай хаця б было гэтак, як цяпер

Наступная суразмоўніца на пытаньне, ці трэба чакаць пасьля выбараў пераменаў адказала: «Калі будуць нейкія перамены, дык толькі да лепшага. Але я б нічога не жадала лепшага. Няхай хаця б было гэтак, як цяпер».

Падышоў да пікету і пакінуў сваё пажаданьне мужчына на добрым падпітку. Напісанае прадэманстраваў. Як выявілася, ён ня быў прыхільнікам дзейнага прэзыдэнта. «Не галасуйце за Лукашэнку», — напісаў мужчына ў сваім пажаданьні.

«Ён мае права на сваё меркаваньне. Мы жывём у свабоднай краіне», — пракамэнтавала журналісту няёмкую сытуацыю жанчына, якая прыглядала за пікетам.

У суботні дзень агітацыйных пікетаў іншых кандыдатаў у прэзыдэнты ў Магілёве заўважана не было. Наагул за прамінулы час агітацыйнага этапу перадвыбарчай кампаніі іх не было. На мінулых прэзыдэнцкіх выбарах агітацыя праходзіла да апошняга дазволенага дня.

Паказаць камэнтары

XS
SM
MD
LG