Лінкі ўнівэрсальнага доступу

logo-print

Указ аб зьнішчэньні прадуктаў, якія трапілі пад расійскае харчовае эмбарга, прэзыдэнт Расеі Ўладзімір Пуцін падпісаў 29 ліпеня 2015 году. Годам раней Расея ўвяла абмежаваньні на імпарт харчовых тавараў з краін, якія ўвялі ў дачыненьні да яе санкцыі: ЗША, краінаў Эўразьвязу, Канады, Аўстраліі і Нарвэгіі. Пад забарону патрапілі мяса, каўбасы, рыба і морапрадукты, гародніна, садавіна, малочная прадукцыя.
Палітычная падаплёка цяперашняга расейскага прадуктовага эмбарга — не мая спэцыяльнасьць. Аднак магу падзяліцца практычнымі рэкамэндацыямі — як распазнаць сапраўдную небясьпечную ежу.

Цьвіль

Цьвіль бывае «высакародная» і шкодная. Першая ўжываецца пры вытворчасьці сыроў накшталт гарганзолы і бры. Гэтую цьвіль можна есьці.

Да высакароднай цьвілі таксама адносіцца пэніцылін.

Астатняя цьвіль — шкодная, або нават вельмі шкодная. Так, да вельмі шкоднай можна аднесьці цьвіль на крупах, арэхах, арахісе і кукурузе. Яна называецца афлатаксыны. Афлатаксыны зьвязаныя з рознымі захворваньнямі, такімі як афлатаксыкоз ў жывёлагадоўлі і чалавечы афлатаксыкоз, а таксама, верагодна, некаторыя формы раку. Многія краіны спрабуюць абмежаваць ўзьдзеяньне афлатаксінаў на здароўе насельніцтва шляхам рэгуляваньня і маніторынгу тавараў, прызначаных для выкарыстаньня ў якасьці прадуктаў харчаваньня і кармоў.
Што рабіць, калі цьвіль распаўзлася па прадуктах харчаваньня? Некаторыя прадукты можна часткова выратаваць, але большасьць неабходна выкінуць. Выратаваць можна цьвёрды сыр (пармэзан, чэдар) і цьвёрдую гародніну і садавіну (морква, капуста). Адрэжце ўсе паверхню, забруджаную цьвільлю, плюс яшчэ мінімальна адзін сантымэтар. Перакладзіце ў чысты посуд ці паперу. Бясьпечная таксама цьвіль на цьвёрдых мясных вырабах тыпу салямі. Выдаліце цьвіль з паверхні мясных вырабаў перад ужываньнем.

Усе астатнія прадукты, на якіх завялася цьвіль, неабходна выкінуць. Гэта датычыцца хлебу, малочных прадуктаў, мяккай садавіны і гародніны, сасісак і каўбас, джэмаў.

Памятайце наступнае. Чысьціня зьяўляецца ключавым фактарам у мінімізацыі цьвілі. Споры цьвілі з забруджанай ежы могуць запраста распаўсюдзіцца па вашым халадзільніку, кухонных ручніках і г. д. Таму рэкамэндавана ачышчаць ўнутраную частку халадзільніка кожныя некалькі месяцаў з растворам харчовай соды (1 сталовая лыжка на кубак вады). Трымайце сурвэткі, ручнікі, губкі, швабры чыстымі. Затхлы пах азначае, што ў іх жыве цьвіль. Выкідвайце ўсе кухонныя прадметы, якія немагчыма надзейна адмыць ці адпрасьці.

Трымаем халодныя прадукты халоднымі

Правільнае астуджэньне прадуктаў запавольвае рост шкодных бактэрыяў. Скорапсавальныя прадукты павінны быць ахалоджаныя да +4° або ніжэй на працягу двух гадзін пасьля пакупкі (і на працягу адной гадзіны, калі навакольная тэмпэратура вышэйшая за +30°).

Ніколі не размарожвайце (а таксама не марынуйце) прадукты на кухоннай паверхні. Рабіце гэта ў халадзільніку.

Майце на ўвазе, што тэрмін прыдатнасьці, напрыклад, ёгурту, які пастаяў адну гадзіну па-за халадзільнікам, укарочваецца на адзін дзень (24 гадзіны).

Трымаем гарачыя прадукты гарачымі

Памятайце аб наступным. Бактэрыі размнажаюцца вельмі хутка ў так званай «небясьпечнай зоне», паміж +4° і +60°. Так што трымайце ежу па-за гэтым дыяпазонам. Трымайце ежу гарачай пасьля гатоўкі, сачыце за тым, каб тэмпэратура не апускалася ніжэй за 60°. Калі ня можаце падаць ежу своечасова, то бок у той момант, калі яна гатова, дык выкарыстоўвайце крыніцу цяпла, накшталт жароўні, грэючага латку або мультываркі, каб захаваць ежу ад астуджэньня.

Разагравайце рэшткі ежы да мінімум 60°. Кухонны тэрмомэтар — карысны інструмэнт на кухні. Выкідвайце рэшткі ежы, калі яны пастаялі у халадзільніку 72 гадзіны, нават калі яны маюць нармальны від і пах.

XS
SM
MD
LG