Лінкі ўнівэрсальнага доступу

Віцебскія прадпрымальнікі зьвярнуліся да кандыдатаў у прэзыдэнты. Адказаў толькі адзін


Ірына Яскевіч

Ірына Яскевіч

Прадпрымальнікі даслалі кандыдатам сьпіс пытаньняў, якія адлюстроўваюць сёньняшнія праблемы дробнага бізнэсу, апавяла Ірына Яскевіч, каардынатарка аргкамітэту па стварэньні прафсаюзу ІП «Разам».

Аднак прадпрымальнікі атрымалі адказ толькі ад Тацяны Караткевіч. У штабе Сяргея Гайдукевіча паабяцалі падумаць над пытаньнямі, але адказу дагэтуль няма. Зьвязацца зь Мікалем Улаховічам або з чальцамі ягонай ініцыятыўнай групы не ўдалося, кажа прадпрымальніца Ірына Яскевіч:

«Паколькі шырокай грамадзкасьці, да якой належаць і прадпрымальнікі, пра спадара Ўлаховіча ўвогуле вядома няшмат, і кантактных дадзеных мы анідзе здабыць не змаглі, то папрасілі нашых менскіх актывістаў схадзіць да яго ў офіс. Тыя хадзілі тры дні, і штораз офіс быў зачынены. Мусіць, Мікалай Улаховіч вырашае нейкія іншыя праблемы, але даведацца ягонае стаўленьне да праблем малога бізнэсу ў нас так і не атрымалася».

Не ўдалося атрымаць якіх-кольвек адказаў і ад Аляксандра Лукашэнкі, працягвае прадпрымальніца:

«Сустрэчаў з гэтым кандыдатам не анансавалася, і адзінае, што нам засталося — гэта скарыстацца формай для зваротаў на сайце www.president.gov.by. Я асабіста пазначыла, што наш зварот — менавіта да кандыдата Аляксандра Лукашэнкі, а не да дзейнага прэзыдэнта. Мы чакалі чаго заўгодна, напрыклад, нейкіх абяцаньняў вырашыць усе праблемы, як было раней. Аднак адказ быў неспадзяваны: мне напісалі, што мы зьвярнуліся „у неналежнай форме“. Дык што, існуе нейкая асаблівая форма зваротаў да кандыдата на прэзыдэнцкую пасаду? Ніколі пра такое не чула!»

Прадпрымальнікі сфармулявалі 9 пытаньняў, ад вырашэньня якіх залежыць лёс дробнага прадпрымальніцтва ў Беларусі. Іх цікавіла, ці гатовыя патэнцыйныя прэзыдэнты падтрымаць зьмены ў заканадаўстве, улічваючы прапановы ІП, ці будзе падтрымана ініцыятыва зарэгістраваць прафсаюз прадпрымальнікаў, ці зьбіраецца новаабараны кіраўнік дзяржавы ўлічваць меркаваньне прадпрымальнікаў пры прызначэньні галіновых міністраў і іншых адказных асобаў, і гэтак далей.

Пытаньні былі дасланы ўдзельнікам прэзыдэнцкіх выбараў яшчэ на этапе збору подпісаў — усім, хто абвясьціў пра свой удзел у выбарчай кампаніі. У дыялёг з прадпрымальнікамі ўступілі Віктар Цярэшчанка і Анатоль Лябедзька, якіх Цэнтравыбаркам не зарэгістраваў у якасьці кандыдатаў. А з тых, хто ў кандыдаты трапіў, на пытаньні адказала толькі Тацяна Караткевіч. На думку аўтараў звароту, або астатніх праблемы прадпрымальніцтва ў Беларусі не хвалююць, або некаторыя з іх абсалютна ня вераць у тое, што змогуць трапіць на вышэйшую дзяржаўную пасаду і нешта вырашаць у краіне.

Паказаць камэнтары

XS
SM
MD
LG