Лінкі ўнівэрсальнага доступу

logo-print

У Менску разьвітваюцца з Аляксеем Каралём


У менскім Палацы мастацтваў ад 14.00 да 15.30 пройдзе разьвітаньне з рэдактарам недзяржаўнай газэты «Новы час» Аляксеем Каралём.

Пасьля трызны прах Аляксея Караля будзе пахаваны на Паўночных могілках.

Гісторык, палітоляг, галоўны рэдактар газэты «Новы Час» Аляксей Кароль памёр 12 верасьня 2015 году. У апошні час Кароль змагаўся з ракам лёгкіх, але працягваў актыўна ўдзельнічаць у працы рэдакцыі і грамадзкім жыцьці Беларусі. Апошнія тры месяцы Аляксей Кароль правёў у коле сям’і сына ў Сынгапуры, дзе праходзіў курс лекаваньня. Аляксей Кароль нарадзіўся ў 1945 годзе ў пасёлку Копысь Аршанскага раёна Віцебскай вобласьці. Быў кандыдатам гістарычных навук, працаваў у Інстытуце гісторыі Акадэміі навук БССР. Аўтар трох гістарычных кніг.

Займаўся палітыкай, быў адным з заснавальнікаў Партыі народнай згоды, быў адным зь лідэраў сацыял-дэмакратаў. У 2004 годзе балятаваўся ў Палату прадстаўнікоў, у 2006 годзе быў даверанай асобай кандыдата ў прэзыдэнты Аляксандра Казуліна.

Выдаваў газэту «Згода», быў галоўным рэдактарам выданьня «Новы час».

Класкоўскі: яго заўжды было цікава паслухаць

Аляксандар Класкоўскі

Аляксандар Класкоўскі

Кіраўнік аналітычных праектаў кампаніі БелаПАН Аляксандар Класкоўскі згадвае Аляксея Караля:

«Аляксей Кароль быў інтэлэктуалам. Гэта чалавек, якога заўжды было цікава паслухаць, нават падыскутаваць. Пры тым, што ён шмат гадоў быў, умоўна кажучы, у дэмакратычным лягеры, разам з тым ён не абмяжоўваўся нейкімі павярхоўнымі лабавымі лёзунгамі, ён стараўся асэнсаваць, у якой сытуацыі знаходзіцца беларускае грамадзтва і куда мы ідзем. Ён быў палітыкам у свой час, потым зьмяніў сфэру дзейнасьці, і на гэта таксама патрабавалася, відаць, унутраная перабудова. Потым ён паказаў сябе таленавітым рэдактарам, і я ведаю, што тыя журналісты, тыя мае калегі, якія зь ім працавалі, вельмі высока ацэньвалі і ягоныя рэдактарскія якасьці, і ягоны дэмакратызм. Ён ня ціснуў аўтарытэтам, даваў кожнаму разгарнуцца, кожнаму выказаць сваю пазыцыю і прадэманстраваць свой талент. Шкада, што такія фігуры сыходзяць, і даводзіцца казаць пра такіх людзей у мінулым часе».

Андрэй Дынько

Андрэй Дынько

Галоўны рэдактар газэты «Наша Ніва» Андрэй Дынько:

«Гэта быў вельмі сумленны чалавек, які добра разумеў, што трэба рабіць, каб наша Беларусь была і каб яна была лепшай. Ён выгадаваў цудоўных дзяцей і пражыў годнае жыцьцё».

Аляксандар Казулін

Аляксандар Казулін

Кандыдат у прэзыдэнты на выбарах 2006 году Аляксандар Казулін:

«Гэта быў чалавек, які балеў за краіну, але не дачакаўся перамен».

Паказаць камэнтары

XS
SM
MD
LG