ПАДЗЕІ ДНЯ
У менскім Палацы мастацтваў ад 14.00 да 16.00 гадзін адбудзецца разьвітаньне з рэдактарам недзяржаўнай газэты «Новы час» Аляксеем Каралём. Пасля гэтага прах Аляксея Караля будзе пахаваны на Паўночных могілках.
У Літаратурным музэі Петруся Броўкі стартуе новы праект «TEXTURA Ў музэі Петруся Броўкі». На вечарыне праекту «Свае Чужыя» выступяць пяць паэтаў: Андрэй Хадановіч, Віктар Жыбуль, Алесь Емяльянаў-Шыловіч, Ірына Карэніна, Тацяна «Асоль» Сьветашова. Пачатак у 18.00.
У менскім бары «Хуліган» з нагоды дня нараджэньня Агінскага, у рамках праектау «250» адбудзецца вялікі канцэрт Anima. У ім возьмуць удзел Алег Хаменка, Naka piano, ili-ili, Уладзімер Пугач, Сяргей Пукст, RockerJocker і іншыя. Пачатак у 19.00.
СЁНЬНЯ
1921 — у Празе пачалася Першая Ўсебеларуская канфэрэнцыя. Прысутнічалі 37 дэлегатаў ад арганізацый і партый Заходняй Беларусі ды шмат якіх краінаў Эўропы. Канфэрэнцыя пацьвердзіла, што адзіным заканадаўчым органам для Беларусі зьяўляецца Рада Беларускае Народнай Рэспублікі.
1971 — адкрыўся мэмарыяльны комплекс «Берасьцейская крэпасьць — герой»
У гэты дзень нарадзіліся:
1765 — Міхал Клеафас Агінскі, вялікалітоўскі дзяржаўны дзяяч, дыплямат, кампазытар.
1875 — Сяргей Паўловiч, багаслоў, пэдагог, перакладчык, дзяяч у галіне царкоўнае асьветы.
1887 — Уільям Фолкнэр, амэрыканскі пісьменьнік, ляўрэат Нобэлеўскай прэміі ў літаратуры.
1906 — Дзьмітры Шастаковіч, расейскі кампазытар.
1913 — Сяргей Грахоўскі, беларускі паэт
1938 — Вячаслаў Целеш, беларускі мастак, дзяяч беларускай дыяспары ў Латвіі.
1938 г. — Мечаслаў ГРЫБ, генэрал-лейтэнант міліцыі, у 1994-1996 гг. — Старшыня Вярхоўнага Савету Рэспублікі Беларусь.
1951 — Пэдра Альмадовар, гішпанскі кінэматаграфіст.
1962 — Алесь Бяляцкі, старшыня праваабарончага цэнтру «Вясна».
ЦЫТАТА НА ПАМЯЦЬ
У выраі ветразь зьнікае
За хваляй, нібы на спачын,
І змора яго не зьлякае,
Ня спыніць тугой далячынь.
У змроку зіхоткая здрада
Завабіць хлусьнёй у віры,
На золку сканае прынада
І кволы прамень на жвіры.
Раптоўна згаданыя мроі
Ў карунках пяшчотнай тугі
Павольна зьнікаюць, як строі,
У бязважкасьці кволай смугі.
Зьнікае ўсхвалёваны ветразь:
З кунегаю пільна сачу,
Як водар аздобіў паветра,
І ў бездані зьнічкі лічу.
Сяргей Грахоўскі, верш без адзінага расейскага слова