Кандыдат у прэзыдэнты Беларусі Мікалай Улаховіч згодны на існаваньне расейскіх вайсковых базаў у краіне. Але пры ўмове, што на іх будзе служыць беларускі кантынгент.
«Адносіны з Расеяй павінны быць брацкімі, але на пэўнай дыстанцыі. Старыя базы няхай застаюцца згодна з дамовамі. А вось новыя базы ў Рэспубліцы Беларусь, тэхніка абсталяваньне, інструктары, дарадцы няхай будуць расейскімі, а асабісты склад пажадана беларускі з падначаленьнем камандаваньню Рэспублікі Беларусь», — заявіў Улаховіч у сваім тэлевыступе 22 верасьня.
Улаховіч адзначыў, што «Беларусь не павінна ўдзельнічаць у агрэсіўных канфліктах, войнах і іншых дзеяньнях на шкоду інтарэсам нашай радзімы».
Прэзыдэнцкія выбары ў Беларусі адбудуцца 11 кастрычніка.
Кандыдатамі на пасаду кіраўніка дзяржавы зьяўляюцца дзейны прэзыдэнт Аляксандар Лукашэнка, актывістка кампаніі «Гавары праўду!» Тацяна Караткевіч, старшыня Лібэральна-дэмакратычнай партыі Беларусі Сяргей Гайдукевіч і лідэр Беларускай патрыятычнай партыі, вярхоўны атаман РГА «Беларускае казацтва» Мікалай Улаховіч.
