Лінкі ўнівэрсальнага доступу

Саладуха аддасьць голас Лукашэнку, Марачкін — за байкот, Паліна Рэспубліка яшчэ ня вызначылася


Belarus - banner famous belarusians, courtesy

Belarus - banner famous belarusians, courtesy

Свабода высьветліла, ці пойдуць 11 кастрычніка на выбарчыя ўчасткі вядомыя дзеячы беларускай культуры і мастацтва і за каго будуць галасаваць.

Булгакаў у роздуме

Рэдактар часопіса ARCHE Валер Булгакаў заявіў Свабодзе, што яшчэ пэўна ня ведае, ці пойдзе ён на прэзыдэнцкія выбары 11 кастрычніка:

«Напэўна, гэта будзе імпульсіўнае рашэньне ў апошні дзень. Калі я буду паводзіць сябе рацыянальна, то я дакладна не пайду. А калі я буду пад наплывам нейкіх эмоцыяў, то, магчыма, я ўсё ж такі наведаю выбарчы ўчастак і прагаласую за Тацяну Караткевіч. У гэтым выпадку я буду галасаваць як абывацель, якому проста сымпатычная Тацяна Караткевіч як жанчына, як грамадзянская актывістка, але не як удзельніца нацыянальнага руху, для якога важная каштоўнасьць — дэмакратыя і свабода ў Беларусі. Бо ў мяне няма адчуваньня, што галасаваньне за Тацяну Караткевіч набліжае нас да гэтых мэтаў».

Марачкін — за «ігнор»

Мастак Аляксей Марачкін заявіў Свабодзе, што ён прыхільнік ігнараваньня выбараў:

«Я ігнарую гэтыя выбары з прычыны таго, што ўжо больш за 20 гадоў на выбары ідзе адзін і той жа кандыдат, і ён будзе да бясконца ісьці. І ўсе гэтыя кандыдаты, гэтыя тры чалавекі — ясна, што яны нейкі працэнт мізэрны возьмуць, але ніхто зь іх ня пройдзе. Таму я цалкам ігнарую гэтыя выбары. Выбараў фактычна няма».

Саладуха за Лукашэнку

Аляксандар Саладуха, фота Сяргея Серабро

Аляксандар Саладуха, фота Сяргея Серабро

Сьпявак Аляксандар Саладуха заявіў Радыё Свабода, што будзе галасаваць за Аляксандра Лукашэнку:

«Безумоўна, я пайду на выбары і буду галасаваць за прэзыдэнта нашага. Чаму? Таму што ён годны», — патлумачыў ён.

Саладуха дадаў, што «абсалютна ня бачыць» сярод іншых кандыдатаў чалавека, які б мог стаць прэзыдэнтам.

Паліна яшчэ думае

Паліна Рэспубліка

Паліна Рэспубліка

Сьпявачка Паліна Рэспубліка (Паліна Паланейчык) сказала, што яшчэ ня вызначылася, ці будзе галасаваць 11 кастрычніка:

«Я, напэўна, яшчэ ня вырашыла для сябе гэтае пытаньне. Як заўжды, у нас няма нейкіх такіх кандыдатаў, за якіх бы хацелася пайсьці і прагаласаваць. А зь іншага боку, ня хочацца заставацца зусім так убаку — усё ж такі нешта трэба рабіць. Але я пакуль ня ведаю, пайду я ці не».

Барысік будзе працаваць

Тацяна Барысік

Тацяна Барысік

Пісьменьніца Тацяна Барысік сказала ў інтэрвію Свабодзе, што, хутчэй за ўсё, на выбары ня пойдзе.

«Я яшчэ ня вызначылася канчаткова са сваім рашэньнем, але, хутчэй за ўсё, не пайду. Па-першае, я ў гэты дзень працую. А па-другое, я думаю, што няма сэнсу біць ногі, калі ўсё загадзя вырашана».

Паказаць камэнтары

XS
SM
MD
LG