Лінкі ўнівэрсальнага доступу

Караткевіч у Смалявічах, Лукашэнка — у Сочы, Улаховіч — на БТ


Тацяна Караткевіч

Тацяна Караткевіч

Агітацыйная кампанія на выбарах прэзыдэнта актыўнасьцю не адрозьніваецца. Агляд карэспандэнта Свабоды.

Выбарчы штаб Тацяны Караткевіч сёньня прааналізаваў яе першы тэлезварот да выбарцаў. Мікалай Улаховіч прысьвяціў дзень падрыхтоўцы свайго выступу, які пачнецца ў 19.30 на тэлеканале «Беларусь 1». Сяргей Гайдукевіч разьмяркоўваў свае агітацыйныя матэрыялы паміж рэгіёнамі. Аляксандар Лукашэнка па-ранейшаму ў Расеі.

Дзьмітрыеў: Сьвятло ў тэлестудыі БТ выставілі не на карысьць Караткевіч

Тацяна Караткевіч сёньня паехала ў Смалявічы, Жодзіна і Барысаў. А перад ад’ездам штаб кандыдаткі правёў разбор яе ўчорашняга тэлевізійнага выступу, — сказаў Свабодзе кіраўнік выбарчага штабу Караткевіч Андрэй Дзьмітрыеў:

«Тацяна проста малайчына. Усім відавочны яе рост як палітыка. І мы гэтым вельмі ганарымся. Некаторыя кажуць, што ў яе выступе не было нейкіх такіх яскравых прыкладаў, пра якія б пасьля ўвесь дзень размаўлялі. Але мы ў першым выступе спэцыяльна не рабілі шмат яскравых вызначэньняў. Там было некалькі цытатаў — і пра шок без тэрапіі, і пра жабракоў-мільянэраў, і пра тое, што Лукашэнка стаміўся...

Аднак наша задача палягала ў тым, каб у людзей зьявілася адчуваньне, што яны слухаюць менавіта праграму. І каб яна не была перакрэсьленая нейкай кідкай цытатай, якая ў межах гэтай стратэгіі была б недарэчнай. Каб у людзей зьявілася адчуваньне, што ёсьць чалавек, які разумее праблемы. І які разумее, што трэба рабіць. Мы гэтага дасягнулі. Таму і лічым учорашні выступ вельмі ўдалым.

Нам было ўчора вельмі прыкра пабачыць, што на тэлебачаньні ўзьнікла праблема з асьвятленьнем для Тацяны. Сьвятло ў студыі было вельмі кепскае. І гэта заўважылі шмат людзей. Ну нельга так падсьвечваць кандыдата. Таму мы, безумоўна, наступным разам возьмем з сабой спэцыяліста, каб сьвятло было выстаўлена на карысьць Тацяны».

Улаховіч пацее на тэкстам выступу па БТ

Мікалай Улаховіч

Мікалай Улаховіч

Сёньня месца Караткевіч у студыі «Беларусь 1» зойме старшыня Беларускай патрыятычнай партыі, «народны атаман» Мікалай Улаховіч. Ён кажа, што выступы папярэднікаў прымушаюць яго папацець над тэкстам:

«Я спрабую напісаць сваю прамову для тэлебачаньня. Спрабую з мукамі. Вось паслухаў свайго сябра Гайдукевіча. Я яго лічу сябрам. Паколькі мы абодва — афіцэры, а ня спарынг-партнэры, як часам пра нас абодвух кажуць. Я яго паслухаў, і цяпер думаю — а як я выступлю? Я ня думаю, што змагу так прыгожа, як ён. Я, шчыра кажучы, думаю пра сябе, што я ў чымсьці грубаваты і вуглаваты».

Гайдукевіч прывёз 2 машыны з улёткамі

Сяргей Гайдукевіч

Сяргей Гайдукевіч

Сяргей Гайдукевіч сёньня займаўся разьмеркаваньнем сваіх агітацыйных матэрыялаў. Дзьве машыны з улёткамі і каляндарыкамі прывезьлі сёньня з друкарні ў офіс Лібэральна-дэмакратычнай партыі Беларусі, кажа першы намесьнік старшыні партыі Алег Гайдукевіч:

«Сёньня ў нас праходзіць пасяджэньне выбарчага штабу з удзелам прадстаўнікоў рэгіянальных структур. Агітацыйныя матэрыялы раздадзім ім. І з гэтых выходных пачынаем пікеты ва ўсіх гарадах, дзе мы гэта заплянавалі. У нас дзьве машыны ўлётак, каляндарыкаў.

Мы значна папоўнілі свой выбарчы фонд. Толькі ўчора атрымалі 40 мільёнаў. І гэта будзе працягвацца і надалей. Хто дае грошы, мы дакладна ня ведаем. Усё гэта робіцца выключна праз банк. Хтосьці зь сябраў партыі кажа, што паклаў пэўную суму, а хтосьці кладзе грошы і ня кажа пра гэта».

Асабісты фінансавы фонд на гэтых выбарах не павінен перавышаць 9000 базавых велічыняў (адна базавая цяпер — 180 000 беларускіх рублёў). Гэта ў тры разы больш параўнальна з выбарамі кіраўніка дзяржавы ў 2010 годзе.

Лукашэнка сустракаецца з Пуціным

Аляксандар Лукашэнка сёньня ў Сочы ўдзельнічае ў расейска-беларускім форуме рэгіёнаў, дзе правёў сустрэчу з расейскім прэзыдэнтам Уладзімерам Пуціным.

XS
SM
MD
LG