Справа аб карупцыі на Ашмянскай мытні можа быць як разавай «піяр-акцыяй», так і пачаткам сур’ёзнай барацьбы з хабарам на мяжы.
У сакавіку КДБ і іншыя праваахоўныя органы выкрылі карупцыйную схему на Ашмянскай мытні, тады затрымалі 19 чалавек, абвінавачаных у хабарніцтве. 15 верасьня кіраўніцтва Дзяржаўнага мытнага камітэту лічбу адкарэктавала — за кратамі ўжо чатыры дзясяткі супрацоўнікаў, ня чыстых на руку. У рамках адной з найбуйнейшых карупцыйных спраў канфіскавана больш за 2 мільёны 200 тысяч даляраў.
Выглядае, што ў злачынную дзейнасьць быў уцягнуты амаль увесь асабовы склад мытнага пасту «Каменны Лог».
Грамадзянскі актывіст з Астравеччыны Мікалай Уласевіч у размове з Радыё Свабода выказаў думку, што чарговыя затрыманьні — звычайны «піяр-ход» напярэдадні выбараў. На яго думку, карупцыя на мяжы распаўсюджаная вельмі шырока, а для таго, каб паказаць, што барацьба зь ёй вядзецца, абралі адзін пераход, які перад нейкім «правініўся».
Іншай думкі трымаецца Алег Воўчак, кіраўнік праваабарончага цэнтру «Прававая дапамога насельніцтву» — да яго спрабавалі зьвярнуцца па дапамогу некалькі чалавек, зьвязаных са справай мытнікаў.
Вялікае затрыманьне можа быць выгадным ня толькі Беларусі, а нават у большай ступені Расеі, ды мець наступствы для іншых памежных пераходаў, — патлумачыў ён Свабодзе. Спадар Воўчак зьвязвае затрыманьні з таварамі, якія празь Беларусь правозяцца ў Расею насуперак тамтэйшым санкцыям. А праходжаньне санкцыйных тавараў б’е па расейскіх вытворцах.
Праваабаронца згодны, што карупцыйныя схемы, хутчэй за ўсё, існуюць і на іншых участках мяжы і мытні: «Проста нешта выйшла за межы, што прыйшлося арыштоўваць усіх, — мяркуе ён. — Ня выключана, што расейскія спэцслужбы падкінулі інфармацыю нашым, а тыя ўжо былі вымушаныя рэагаваць. Бо такі паток прадукцыі ішоў, што трэба было Расеі неяк рэагаваць».
На думку праваабаронцы, затрыманыя могуць пайсьці на супрацу са сьледзтвам, каб зьменшыць сабе пакараньне: «Тады ня выключана, што могуць выйсьці і на іншыя рэгіёны, бо мытнікаў чаргуюць: Горадню — на Берасьце, на Літву, ёсьць такая практыка. Могуць усплыць і іншыя кантрабандныя шляхі праходжаньня гэтага тавару».