Як паведаміў дзярждэпартамэнт ЗША, Керы даў зразумець, што працяг падтрымкі з боку Расеі прэзыдэнта Сырыі Башара Асада нясе ў сабе рызыку пашырэньня канфлікту і падрывае агульную мэту барацьбы з экстрэмізмам. Асабліва ў той час, калі бакі застаюцца сканцэнтраваныя на пошуку сапраўднага палітычнага рашэньня канфлікту ў Сырыі.
Кіраўнік амэрыканскага дыпляматычнага ведамства таксама пацьвердзіў прыхільнасьць ЗША барацьбе з экстрэмісцкай групоўкай «Ісламская дзяржава» ў кааліцыі з больш чым 60 краінамі, у якой Асад ніколі ня мог быць надзейным сябрам. Керы сказаў, што ЗША будуць вітаць канструктыўную ролю Расіі ў намаганьнях па барацьбе з экстрэмісцкай групоўкай «Ісламская дзяржава». Дзяржаўны сакратар падкрэсьліў, што ваеннага рашэньня канфлікту ў Сырыі не існуе, і што канфлікт можа быць вырашаны толькі «палітычным пераходам ад Асада».
Прэсавы сакратар Белага Дому Джош Эрнэст падтрымаў пазыцыю Керы: «Мы далі ясна зразумець, што далейшая падтрымка — ваенная ці іншая — рэжыму Асада, дэстабілізуе [сытуацыю] і зьяўляецца контрапрадуктыўнай, найперш таму, што Асад згубіў легітымнасьць, каб кіраваць краінай».
Эрнэст назваў памылкай «расейскае рашэньне падвоіць стаўкі ў падтрымцы Асада».
