Лінкі ўнівэрсальнага доступу

logo-print

Гайдукевіч хоча дэбатаў з Лукашэнкам


Сяргей Гайдукевіч (на пярэднім пляне) падчас рэгістрацыі кандыдатаў на прэзыдэнта ў ЦВК. Менск, 10 верасьня 2015 году

Сяргей Гайдукевіч (на пярэднім пляне) падчас рэгістрацыі кандыдатаў на прэзыдэнта ў ЦВК. Менск, 10 верасьня 2015 году

Лідэр ЛДПБ, кандыдат у прэзыдэнты Сяргей Гайдукевіч перакананы, што ў Беларусі толькі тры харызматыкі: Пазьняк, Лукашэнка і ён сам.

Кандыдат у прэзыдэнты Сяргей Гайдукевіч лічыць, што першы этап прэзыдэнцкіх выбараў праходзіў у беспрэцэдэнтна добрых умовах, бо зьбіраць подпісы можна было паўсюль, ніякіх абмежаваньняў для патэнцыйных кандыдатаў не было.

«Першы этап прайшоў у канкурэнтнай, роўнай барацьбе. Гэта вельмі радуе», — заявіў Сяргей Гайдукевіч на сёньняшняй прэс-канфэрэнцыі.

На ягоную думку, подпісы сабралі менавіта тыя, хто мог гэта зрабіць і хто гэтага хацеў.

«Хто колькі хацеў, столькі і сабраў подпісаў», — сказаў ён.

Паводле Гайдукевіча, калі наступны этап выбарчай кампаніі будзе гэтаксама свабодны, то можна разьлічваць на тое, што ў Беларусі пасьля выбараў зьявіцца «палітычная эліта».

Гайдукевіч таксама крытычна выказаўся наконт тых, хто застаўся незадаволены першым этапам выбарчай кампаніі:

«Хочацца сказаць: Анатоль, ідзі зьбірай подпісы, хопіць піярыцца».

Журналісты зьвярнуліся да Гайдукевіча з пытаньнем, як ён ставіцца да разьмяшчэньня расейскай авіябазы ў Беларусі. Але кандыдат у прэзыдэнты ўхіліўся ад прамога адказу. Замест гэтага ён зьвярнуў увагу на тое, што Эўразьвяз дагэтуль ня зьняў санкцыі супраць уладаў Беларусі.

«Я зьвяртаюся да эўрапейскіх партнэраў: мы столькі ўжо зрабілі крокаў насустрач вам, зрабіце і вы нешта станоўчае, прыпыніце санкцыі. Мінімальны рух ЭЗ у бок Беларусі — і пытаньні „так“ ці „не“ будуць зьнятыя самі сабой», — заявіў кандыдат у прэзыдэнты.

Паводле слоў лідэра ЛДПБ, у прынцыпе ніхто ня хоча, каб у ягонай краіне былі замежныя базы, але «ёсьць сытуацыі, калі няма выйсьця, калі трэба прымаць рашэньне».

Адказваючы на пытаньні журналістаў, Гайдукевіч заявіў, што вельмі б хацеў дэбатаў з Лукашэнкам. Ён таксама разьлічвае, што выбары будуць прызнаныя на Захадзе.

Разважаючы пра беларускую палітыку, лідэр ЛДПБ выказаў думку, што ў Беларусі ёсьць толькі тры сапраўдныя «харызматыкі»: Пазьняк, Лукашэнка і Гайдукевіч.

XS
SM
MD
LG