Пастаўкі расейскай зброі ў Сырыю «былі, ідуць і будуць працягвацца». Пра гэта ў эфіры перадачы расейскага Першага каналу «Воскресное время» заявіў міністар замежных справаў Расеі Сяргей Лаўроў. Ён адзначыў, што гэтыя пастаўкі «непазьбежна суправаджаюцца накіраваньнем расійскіх спэцыялістаў, якія дапамагаюць навучаць сырыйскі пэрсанал абыходжаньню з гэтымі ўзбраеньнямі». Паводле Лаўрова, вайскова-тэхнічнае супрацоўніцтва Масквы і Дамаску накіравана на дапамогу ў барацьбе з тэрарызмам.
Сырыйскія дзяржаўныя СМІ напярэдадні паведамілі аб прыбыцьці ў краіну двух расейскіх самалётаў з гуманітарнай дапамогай. Мінабароны Расеі раней заяўляла аб адпраўцы ў Сырыю абсталяваньня для намётавага лягера на тысячу ўцекачоў.
Міністар замежных справаў Нямеччыны Франк-Вальтэр Штайнмаер у сераду папярэдзіў аб непажаданасьці ўмяшаньня Расеі ва ўзброены канфлікт у Сырыі. У ЗША лічаць, што дзеяньні Крамля могуць прывесьці да далейшага «росту гвалту і нестабільнасьці» у рэгіёне.
