Паводле інфармацыі Der Spiegel, былыя акцыянэры кампаніі ЮКАС падалі пазоў у Вышэйшы зямельны суд Бэрліна з тым, каб спагнаць з Расеі 42 млрд даляраў.
Пра гэта паведамляе Deutsche Welle. Акцыянэры такім чынам дамагаюцца прывядзеньня ў выкананьне рашэньня Гааскага суду па справе ЮКАСа. Па дадзеных выданьня, патрабаваньне экс-акцыянэраў зараз разглядае міністэрства юстыцыі Нямеччыны, затым МЗС краіны перадасьць яго расейскім уладам.
Арышт можа быць накладзены на расейскую нерухомасьць на тэрыторыі ФРГ, а таксама на даходы дзяржаўных энэргетычных кампаній Расеі ад зьдзелак у Нямеччыне. У ліпені 2014 года Расея прайграла амаль дзесяцігадовы судовы працэс, які ініцыявалі былыя акцыянэры кампаніі ЮКАС.
Трацейскі суд у Гаазе прызнаў, што Расея парушыла Энэргетычную хартыю ў 2004 годзе і фактычна экспрапрыявала нафтавую кампанію ў яе законных уладальнікаў. Суд ацаніў страты акцыянераў у 50 млрд даляраў. Расея абскардзіла рашэньне суда. Экс-акцыянэры ўжо зьвярнуліся ў суды Вялікабрытаніі, Францыі, Бэльгіі і ЗША за выкананьнем рашэньня Гаагі.
