Лінкі ўнівэрсальнага доступу

Ужо сёньня 12 верасьня 2015: «Зона Свабоды» на Белсаце — новы сэзон


Падзеі і даты сёньняшняга дня ў Беларусі, сьвеце, гісторыі.

А 19.00 гадзіне адбудзецца прэм’ера абноўленай перадачы «Зона Свабоды» на тэлеканале Белсат. Аналітыкі Радыё Свабода Юры Дракахруст, Сяргей Навумчык, Віталь Цыганкоў горача спрачаюцца пра прэзыдэнцкую кампанію, праўду-матку рэжуць мінакі на вуліцах Менску, у экслюзыўным інтэрвію для Зоны Свабоды пра Беларусь і Лукашэнку гаворыць што думае першы прэзыдэнт Украіны Леанід Краўчук. Вядзе гутарку дырэктар Беларускай службы Аляксандар Лукашук. Паўтор у нядзелю а 20.35 — глядзіце!

У Берасьці працягваецца міжнародны тэатральны фэстываль «Белая вежа».

У вёсцы Гіравічы Валожынскага раёну адбудзецца двухдзённы дабрачынны фэстываль «Карчма» дзеля захаваньня і падтрыманьня належнага стану гістарычнай карчмы XVII-XVIII стагодзьдзяў. Галоўныя фэстывальныя дзеяньні будуць сканцэнтраваныя на ўпарадкаваньні тэрыторыі. Увечары адбудзецца канцэрт з удзелам гуртоў «Стары Ольса», «Літы Талер», «Ceiliсh Сeol», фальклорнага ансамблю «Гасцінец» з Ракава і інш. Спэцыяльны госьць — Анатоль Кашапараў (ансамбль «Песьняры»).

У Менску 12-13 верасьня пройдзе шэраг культурных, спартовых і забаўляльных захадаў, прымеркаваных да Дня гораду.

У межах Форуму выдаўцоў у Львове адбудзецца прэзэнтацыя дзейнасьці Таварыства ўкраінскай літаратуры пры Саюзе беларускіх пісьменьнікаў.

У гісторыі:

1893 — нарадзілася Паўлiна Мядзёлка, беларуская артыстка, пэдагог, мэмуарыстка. У 1913 выканала ролю Паўлінкі ў пецярбурскай прэм’еры аднайменнай п’есы Янкі Купалы.

1929 — нарадзіўся Мікалай Матукоўскі, беларускі драматург.

1945 — нарадзіўся Рыгор Семашкевіч, беларускі пісьменьнік і літаратуразнаўца.

1954 — нарадзіўся Алесь Жлутка, беларускі мовазнаўца і гісторык.

1990 — дамову аб аб’яднаньні Нямеччыны падпісалі міністры замежных справаў СССР, ЗША, Вялікабрытаніі, Францыі і абедзьвюх Нямеччын.

У памяці:

1934 — памёр Яўген Барычэўскі, беларускі літаратуразнаўца і перакладчык.

Цытата:

«Заўтра ўсё... Заўтра сьмерць.
Мяне выведуць каты.
Сакавік на двары... Яшчэ тыдзень —
і птушкі дамоў,
О буслы, дзеці сонца!
Летучы, адшукайце вы хату,
Дзе жыве маё шчасьце, якога ў жыцьці не знайшоў.

У вясновай красе! Ясна-чыстая, нібы бяроза.
Вуснаў не цалаваў і яе не насіў на руках.
Птушкі! Людзі казалі... Прашу вас праз сьлёзы —
Ўкіньце вы ёй праз комін маленькага хлапчука.»

Рыгор Семашкевіч «Апошняя ноч Каліноўскага» (фрагмэнт)

Паказаць камэнтары

XS
SM
MD
LG