Лінкі ўнівэрсальнага доступу

Заяўку на доўгатэрміновую акцыю мэрыя Кішынёва пацьвердзіла яшчэ 1 верасьня — пра гэта заявіў Андрэй Нэстасе, адзін зь лідэраў грамадзянскай плятформы «Годнасьць і праўда» (DA), якая арганізоўвае пратэсты на плошчы Вялікага Нацыянальнага Сходу ў Кішынэве.

Чарговы антыўрадавы мітынг на плошчы заплянаваны на 13 верасьня.

«У гэты дзень, у нядзелю, адбудзецца новая масавая маніфэстацыя, каб пацьвердзіць яшчэ раз нашы патрабаваньні да ўлады. Мы ня бачым іншых перашкодаў, мы будзем стаяць тут, на плошчы...» — заявіў на прэсавай канфэрэнцыі ў сераду 9 верасьня Нэстасе.

Пратэстоўцы выступаюць за адстаўку дзейнага ўраду, парлямэнту і прэзыдэнта і патрабуюць датэрміновых выбараў. Прэзыдэнт Малдовы Нікалае Цімафці і прэм’ер-міністар Валеры Стралец заявілі, што іхная адстаўка яшчэ больш дэстабілізуе сытуацыю. У сераду, 9 верасьня, кіраўнікі DA сустракаліся з прэм’ер-міністрам Валерыем Стральцом і спікерам парлямэнту Адрыянам Конду. Пра вынікі сустрэчы Радыё Свабода распавяла актывістка DA, адна з арганізатарак пратэсту Інга Грыгорыю:

Інга Грыгорыю

Інга Грыгорыю

«Мы сёньня былі ва ўрадзе, размаўлялі з прэм’ерам (Валерыем Стральцом. — РС). Дыялёг спачатку быў зь іхнай „высокай“ пазыцыі. І ў выніку яны ніяк не далі нам зразумець, што яны хочуць супрацоўнічаць і разумеюць нас. Былі некаторыя нават абвінавачаньні ў зьмене ўлады, хоць тут пратэстуюць толькі грамадзяне Малдовы.

Пасьля была сустрэча ў парлямэнце, мы сустракаліся са сьпікерам Андрыянам Канду. Гэтая сустрэча прайшла на іншым узроўні, больш схільным да супрацоўніцтва і дыялёгу. У асноўным яны паказвалі, што яны працуюць. Нас гэта не задавальняе. Столькі гадоў прайшло, а краіне ўсё горш і горш. Усе тэрміны, што яны даюць, — ёсьць уражаньне, што яны хочуць дацягнуць, пакуль ня стане холадна, людзі замерзнуць і сыйдуць адсюль.

Дабіліся двух пунктаў асноўных. Калі ў іх будзе ў парлямэнце першае паседжаньне, то можа быць адстаўка кіраўніка Нацбанку і генэральнага пракурора».

Паводле Грыгорыю, намётавы лягер насупраць Дому ўраду толькі разрастаецца.

«У нас вельмі шмат валянтэраў. Людзі толькі пытаюцца: чым вам дапамагчы? Сёньня ўсталёўваем палатку для мерапрыемстваў для прэсы. Усталявалі мэдпункт, на кухні працуюць людзі ад душы, — кажа актывістка. — Але гэта ўсё ня сьвята — гэта пратэст. Пратэст супраць улады. Усе людзі аб’ядналіся супраць іх, супраць тых, хто нас проста трымае ў сваіх інтарэсах, выкарыстоўвае нас для сваёй грашовай выгады. Мы проста нейкі інструмэнт, каб яны пасьля сабе будавалі дамы, каталіся на дарагіх машынах, мелі маёмасьць за мяжой. У выніку гэта ўсё адбіваецца і на малым бізнэсе. Усе грошы, якія мы сплочваем у выглядзе падаткаў, усё гэта проста раскрадаецца з нашых банкаў і выводзіцца ў афшорныя прадпрыемствы».

Грыгорыю, мабыць, мае на ўвазе і скандальны інцыдэнт, які часткова стаў падставай для выхаду людзей на малдаўскую «Плошчу». У лістападзе 2014 году з банкаўскай сыстэмы Малдовы зьнік 1 млрд даляраў — чацьвёртая частка ВУП краіны. Тры малдаўскія банкі выдавалі грошы афшорным кампаніям, у тым ліку ў выглядзе крэдытаў, пра якія адпачатку было зразумела, што іх ніколі ня вернуць. Кампаніі лічаць афіліяванымі з малдаўскім бізнэсмэнам габрэйскага паходжаньня Іланам Шорам — цяпер ён мэр буйнога малдаўскага гораду Архей (Аргееў).

Журналісты телеканалу АНТ у Малдове

Журналісты телеканалу АНТ у Малдове

Актывістка DA Інга Грыгорыю ўпэўненая, што пратэсты працягнуцца. Мы папрасілі Інгу пракамэнтаваць распаўсюджанае сярод малдаўскіх пратэстоўцаў меркаваньне пра Аляксандра Лукашэнку як добрага кіраўніка.

«Ня веру, што ўсе так гавораць, — кажа Інга. — Тое, што мы чуем пра рэжым, усталяваны ў Беларусі, — гэта тое, што там ёсьць прэзыдэнт, які трымае ў сваіх руках амаль усё грамадзтва. У вас таталітарны рэжым. Ня ведаю, наколькі беларусам лёгка ад таталітарнага рэжыму. Можа, там чыста, але гэта не дэмакратычна. Таму людзі павінны змагацца, выйсьці з гэтай клеткі. Гэта маё меркаваньне. Я не была ў Беларусі, можа, вам там і добра. Але думаю, што таталітарны рэжым не азначае лепшае жыцьцё».

XS
SM
MD
LG