Лінкі ўнівэрсальнага доступу

Журналістаў, аштрафаваных на 55 мільёнаў, узнагародзілі за адданасьць прафэсіі


Кастусь Жукоўскі, Натальля Крывашэй
Кастусь Жукоўскі, Натальля Крывашэй

Гомельская філія ГА «Беларуская асацыяцыя журналістаў» уганаравала мясцовых фрылансэраў Кастуся Жукоўскага і Натальлю Крывашэй адмысловымі дыплёмамі «За адданасьць прафэсіі».

Рашэньне прынята напярэдадні, у Міжнародны дзень салідарнасьці журналістаў, на сходзе філіі.

«У конкурсе ўдзельнічалі журналісты зь Берасьця, Гомеля, Менску. Перавагу сябры філіі аддалі Кастусю Жукоўскаму і Натальлі Крывашэй, таму што яны пры выкананьні прафэсійных абавязкаў сапраўды зазнавалі значныя перашкоды, годна іх пераадольвалі, мужна адстойваючы свае правы на прафэсійную дзейнасьць. Гэта адна з адметнасьцяў і ўмоваў заснаванага намі конкурсу», — кажа старшыня Гомельскай філіі ГА «БАЖ» Анатоль Гатоўчыц.

Куды б ні паехалі фрылансеры зь відэакамэрай — у Рэчыцкі, Нараўлянскі, Лоеўскі, Буда-Кашалёўскі, Рагачоўскі раён, — іх амаль паўсюль перасьледавала міліцыя, альбо на іх наўздагон складалі адміністрацыйныя пратаколы за працу без акрэдытацыі і незаконны выраб прадукцыі СМІ, якая, як пазначалася ў пратаколах, дэманстравалася на спадарожнікавым тэлеканале «Белсат» (Польшча).

«Сёлета супраць мяне міліцыя склала 8 адміністрацыйных пратаколаў. Было ўжо шэсьць судоў за так званы незаконны выраб прадукцыі сродкаў масавай інфармацыі і адзін суд нібыта за ўдзел у несанкцыянаваным пікеце — гэта калі я здымаў на відэа пікетоўца-інваліда ў Сьветлагорску. Натальлю Крывашэй суды штрафавалі чатыры разы. Агулам сума нашых штрафаў склала 55,8 мільёна рублёў. Гэтулькі каштавала нам свабода слова ў Беларусі», — падсумоўвае гомельскі журналіст-фрылансэр Кастусь Жукоўскі.

Агулам сума нашых штрафаў склала 55,8 мільёна рублёў. Гэтулькі каштавала нам свабода слова ў Беларусі

Натальля Крывашэй лічыць, што ў сваім жаданьні прыдушыць распаўсюд незалежнай інфармацыі напярэдадні прэзыдэнцкіх выбараў улады даходзяць да сьмяхоцьця, да абсурду.

«У Рагачове, — згадвае Натальля, — судзьдзя Крайнікаў на падставе міліцэйскага пратаколу пакараў мяне на 6 мільёнаў 300 тысяч рублёў за тое, што я стаяла побач з гараджанінам, які распавядаў пра склады, заваленыя нерэалізаванай згушчонкай, і, як сказана ў судовай пастанове, „кіўкамі галавы і мімікай твару падтрымлівала яго, гэта значыць, падахвочвала да размовы“».

Журналісты-фрылансэры імкнуцца абскарджваць пакараньні штрафамі ў вышэйшых судовых інстанцыях, але пакуль безвынікова.

«Разам з Жукоўскім і Крывашэй цяпер мы рыхтуем наглядныя скаргі ў Вярхоўны суд. Калі штрафы ня будуць адмененыя, зьвернемся ў Камітэт ААН па правах чалавека — будзем супольна адстойваць права на свабоду слова, на бесьперашкодны збор і распаўсюд інфармацыі, гарантаваныя Канстытуцыяй і міжнароднымі пагадненьнямі, якія падпісала Беларусь», — паведаміў гомельскі праваабаронца, юрыст Леанід Судаленка, які дапамагае аштрафаваным журналістам-фрылансэрам.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG