Лінкі ўнівэрсальнага доступу

logo-print

У гонар бітвы пад Воршай аршанцы гулялі ў «1514»


Падчас гульні

Падчас гульні

Аршанская суполка «Зьвяз» запрасіла гараджан на камандны турнір гульні «1514», якая прайшла ў нядзелю 6 верасьня.

Гэта настольная гульня, у якой удзельнікам прапануецца стаць на чале або маскоўскага войска, або сілаў Вялікага княства Літоўскага і выконваць заданьні з картак, распрацоўваючы ўласную стратэгію перамогі.

Такая імпрэза праходзіла ў Воршы ўпершыню. У турніры ўзялі ўдзел каля 30 чалавек — мясцовых актывістаў і моладзі, якая адгукнулася на аб’яву пра гульню. Усім ахвотным нават не хапіла месца за чатырма сталамі, і яшчэ колькі чалавек мусілі чакаць свае чаргі, каб пагуляць у гульню, створаную паводле гістарычных падзеяў паўтысячагадовай даўніны.

Падчас гульні

Падчас гульні

Турнір быў прымеркаваны да 501-х угодкаў славутай бітвы пад Воршай, якая адбылася 8 верасьня 1514 году. Гэта была бітва, падчас якой войска на чале з Канстанцінам Астроскім, вялікім гетманам Вялікага Княства Літоўскага, перамагло ўтрая большае войска Маскоўскага княства.

Пераможцы настольнай гульні атрымалі прызы — фірмовыя майкі ад удзельнікаў кампаніі «Мы — аршанцы, мы — беларусы» і пачастункі. Напрыканцы адбыўся выступ барда Андрэя Мельнікава, які прыязжае гэткай парой у Воршу штогод.

Прызы для пераможцаў

Прызы для пераможцаў

Мельнікаў зьяўляецца адным з заснавальнікаў бардаўскага фэсту «Аршанская бітва», які ладзіўся на месцы баявых падзеяў з 1990-х. Аднак бардаўская імпрэза трапіла пад забарону: у 2007 годзе міліцыя ачапіла ўсе пад’езды да вёскі Гацькаўшчына, каля якой адбываліся вялікія канцэрты. Людзей зь плецакамі і гітарамі затрымлівалі на аршанскіх вакзалах і гвалтам адпраўлялі з горада, а некаторых нават забіралі ў пастарунак.

Сьпявае Андрэй Мельнікаў

Сьпявае Андрэй Мельнікаў

З тае пары міліцыя пільнавала ўдзельнікаў, шукаючы іх па бліжэйшых ад месца Аршанскай бітвы лясах. Паступова традыцыя зьбірацца на бардаўскія канцэрты ў першыя выходныя верасьня трансфармавалася ў прыватныя сустрэчы або іншыя мерапрыемствы. Але штогод 8 верасьня, на ўгодкі Аршанскай бітвы, ў гэтыя мясьціны прыяжджаюць людзі, ускладаюць кветкі і запальваюць сьвечкі каля крыжа ў памяць палеглых ваяроў.

На полі Аршанскай бітвы сёньня

На полі Аршанскай бітвы сёньня

XS
SM
MD
LG