Лінкі ўнівэрсальнага доступу

Абвінавачаны па «справе графіцістаў»: Міліцыянт заляцеў у вакно з крыкам „Вы што, савецкую ўладу ня любіце?“


Паводле аднаго з абвінавачаных па «справе графіцістаў» Максіма Пякарскага, пры затрыманьні ім пагражалі, што ніхто ня выйдзе на волю.​

Пра гэта ён апавёў Праваабарончаму цэнтру «Вясна».

«У момант затрыманьня я, Вадзім Жаромскі і яшчэ адзін грамадзянін Расеі знаходзіліся ў кватэры, вокны ў пакоі былі расчыненыя. Сядзелі, размаўлялі на побытавыя тэмы. І раптам я заўважыў, што нешта сыплецца зьверху на падваконьне. І літаральна празь некалькі хвілінаў зьверху па канаце спусьціўся чалавек, увесь у экіпіроўцы, заляцеў у вакно, дастаў пісталет, навёў на нас і крыкнуў: „Усім ляжаць!“ Адразу за ім праз вакно заляцеў яшчэ адзін супрацоўнік з крыкам: „Вы што, савецкую ўладу ня любіце?“ Мы былі ў шоку ад таго, што адбываецца. Пасьля гэтага яны пачалі лаяцца, зьбіваць нас, ужываць электрашокер. Хтосьці зь іх адчыніў дзьверы — забеглі яшчэ некалькі чалавек. Агулам у кватэры іх было каля дзесяці, у тым ліку і сьледчыя.

Пасьля пачалі псыхалягічна ціснуць, выбіваць прызнаньні ў маляваньні графіці, дапытваць па чарзе адразу ў кватэры, пагражалі, што пасадзяць у турму.

Пасля прайшоў вобшук у кватэры, праглядалі ўсё вельмі дасканальна, літаральна кожную паперку. Але панятых прывялі толькі хвілін праз 20 пасьля таго, як пачалі агляд. Потым пачалі апісваць і вымаць кампутары, флэшкі, дакумэнты, банкаўскія карткі. Папсавалі маёмасьць у кватэры — разьбілі шкляны столік, напрыклад.

Сталі пагражаць, што пасадзяць у турму ня толькі нас, але і маю дзяўчыну. Яна ў гэты час мне якраз тэлефанавала. Супрацоўнік падняў тэлефон і падманам выклікаў яе на допыт. Сказаў, нібыта я на ровары зьбіў дзіця, і трэба, каб яна таксама пад’ехала.

Супрацоўнік падманам выклікаў маю дзяўчыну на допыт. Сказаў, нібыта я на ровары зьбіў дзіця, і трэба, каб яна таксама пад’ехала

Мне не давалі тэлефанаваць, груба парушалі мае правы, у тым ліку і права на абарону.

Пасьля вобшуку нас вывелі ў кайданках, як злачынцаў, пасадзілі ў машыну і адвезьлі ў Сьледчы камітэт. Там на нас працягвалі ціснуць, пагражаць, дапытвалі да самай ночы. Казалі, што мы трапілі на „базу“ і ўжо ніколі ня выйдзем на волю. Там жа дапытвалі і маю дзяўчыну, пагражалі і ціснулі на яе».

11 жніўня пяцёра хлопцаў былі жорстка затрыманыя па падазрэньні ва ўдзеле па трох крымінальных справах: нанясеньні беларускамоўных графіці «Беларусь мае быць беларускай» і «Рэвалюцыя сьвядомасьці, яна ўжо ідзе...», а таксама пэцканьні фарбай сацыяльнага білборда з выявамі супрацоўнікаў міліцыі.

20 жніўня Сьледчы камітэт прад’явіў абвінавачваньні Максіму Пякарскаму і Вадзіму Жаромскаму па артыкуле «Хуліганства, учыненае групай асобаў».

Праваабарончы цэнтар «Вясна» запатрабаваў неадкладнага вызваленьня з-пад варты Вячаслава Касінерава, Максіма Пякарскага і Вадзіма Жаромскага.

31 жніўня Пякарскага і Жаромскага адпусьцілі пад падпіску аб нявыезьдзе і падпіску аб неразгалошваньні.

У заяве Сьледчага камітэту ад 31 жніўня гаворыцца:

«Абвінавачаныя сваю віну ў інкрымінаваных дзеяннях прызналі цалкам, чыстасардэчна раскаяліся і пакрылі прычыненую шкоду ў поўным аб’ёме.

Тлумачачы следчым матывы сваіх дзеянняў, адзін з падазраваных апавёў, што пашкодзіў білборды з-за крыўды на супрацоўнікаў праваахоўных органаў

З улікам выкананьня неадкладных сьледчых дзеяньняў па справе, прызнальных паказаньняў абвінавачаных, іх раскаяньня і кампэнсацыі нанесенай шкоды, а таксама ўлічваючы той факт, што абвінавачаныя ня змогуць перашкодзіць далейшаму расьсьледаваньню крымінальнай справы, сьледства палічыла магчымым хадайнічаць перад пракурорам аб зьмене меры стрыманьня. Гэтае хадайніцтва задаволена».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG