Лінкі ўнівэрсальнага доступу

Цярэшчанка можа зьняцца з выбараў


Віктар Цярэшчанка ў 3-м менскім гарадзкім шпіталі

Віктар Цярэшчанка ў 3-м менскім гарадзкім шпіталі

Патэнцыйны кандыдат на прэзыдэнта Беларусі Віктар Цярэшчанка разглядае магчымасьць зьняцьця з выбарчай прэзыдэнцкай кампаніі.

Пра гэта ён заявіў сёньня Радыё Свабода, знаходзячыся ў 3-м менскім гарадзкім шпіталі:

«Калі стан майго здароўя не палепшыцца, то я думаю зьняцца з выбараў. Калі будзе на мяне ціск, то здымуся. Гэта можа адбыцца ў любы мамант. Але пакуль я ня стаўлю задачу зрабіць гэта зараз ці праз гадзіну. Я пакуль яшчэ ня ў тым стане, каб прыняць правільнае рашэньне.

Колькі я яшчэ тут буду? Ясна, што ня дзень, а болей. Я ўстаю і трымаюся пяць хвілін. Вось учора прыяжджаў сюды мой таварыш — сьвятар. Я ўстаў памаліцца і паваліўся. Не магу нават стаяць».

Віктар Цярэшчанка кажа, што ён па-ранейшаму пад кропельніцай:

«Галава як бы нямая. Але ніякіх прышчоў ці ацёкаў на твары няма. Крывяны ціск нармальны. Тэмпэратура нармальная. А замест галавы нібыта камень.

Я напісаў пісьмовую заяву аб пераводзе ў аддзяленьне таксыкалёгіі. Я ж ляжу ў аддзяленьні пульманалёгіі. Пры чым тут лёгкія? Праўда, трымаюць пад кропельніцай, рэгулярна робяць уколы».

Віктару Цярэшчанку робяць кропельніцу

Віктару Цярэшчанку робяць кропельніцу

Са словаў Цярэшчанкі, зь ім здарыўся востры прыступ пасьля таго, як раніцай мінулай пятніцы ён выпіў у кавярні «Грунвальд» маркоўны фрэш:

«Калі я выпіў фрэш, я амаль страціў прытомнасьць. Але я пасьпеў яшчэ схадзіць у туалет, прамыць рот. Званітаваў. Можа, гэта і выратавала».

Віктар Цярэшчанка кажа, што ў «Грунвальдзе» ён быў з двума паплечнікамі са сваёй выбарчай каманды:

«Гэта было на пачатку дзявятай раніцы. Тут яшчэ былі Дзьмітрыеў і Караткевіч. Яны прайшлі побач. Мы павіталіся. А больш нікога так рана там не было».

Патэнцыйны кандыдат на прэзыдэнта думае, што ў ягонай гісторыі трэба шукаць зьнешні сьлед:

«Тут ёсьць прысутнасьць нейкай трэцяй асобы. Я схіляюся болей да зьнешняга сьледу. Беларускай выканаўчай уладзе гэта ня выгадна. Ёй прасьцей мяне не зарэгістраваць. Але я лічу, што з апазыцыі я застаўся адзін. Глядзіце, што атрымліваецца — застаюцца Ўлаховіч, Гайдукевіч і Караткевіч. Усе яны схіляюцца да ўладаў. А я незалежны. Значыць, мяне трэба прыбраць. Альбо прынамсі каб я сам адмовіўся. Альбо яшчэ нешта.

Трэцюю асобу я разглядаю як прыхільнікаў „апазыцыі“. Менавіта не апазыцыі, а „апазыцыі“ ў двукосьсі. Я магу думаць, што гэта, можа, і Дзьмітрыеў. Але зроблена гэта з удзелам спэцыялістаў. Бо без спэцыялістаў гэтую работу ня зробіш».

Спадар Цярэшчанка кажа, што міліцыя праводзіць сьледзтва па гэтым факце. Зь ім ужо двойчы размаўлялі апэратыўнікі.

Віктар Цярэшчанка пракамэнтаваў Свабодзе і паведамленьне з сайта праваабарончага цэнтру «Вясна», што больш за 10 тысяч подпісаў, сабраныя за яго ў Горадні, падробленыя:

«Нейкі праваабаронца сказаў. Ці то гэта „вутка“, ці то што? Сёньня любы можа напісаць што захоча. Гэта заказны матэрыял. Той жа Караткевіч альбо кагосьці іншага. І кіраўнік штабу асабіста, і іншыя адказныя асобы з нашай групы глядзелі подпісы. І выпусьціць іх не маглі без выбракоўкі. Падстава любая можа быць. Улада захоча зьняць, дык мільён падставаў можа знайсьці. Будзе пасяджэньне ЦВК. Там і будзем глядзець».

Паказаць камэнтары

XS
SM
MD
LG