Лінкі ўнівэрсальнага доступу

66941 асобу адабралі ўлады для падліку бюлетэняў падчас сёлетніх прэзыдэнцкіх выбараў. Амаль палова зь іх (каля 30 тысяч) — прадстаўнікі адной грамадзкай арганізацыі — праўладнай «Белай Русі». А вось ад апазыцыі ва ўчастковыя камісіі ўвайшлі толькі 32 асобы. Нават на папярэдніх прэзыдэнцкіх выбарах іх было 183.

Старшыня Цэнтральнай выбарчай камісіі Лідзія Ярмошына сёньня на прэсавай канфэрэнцыі паведаміла пра вынікі фармаваньня ўчастковых камісіяў. Менавіта яны і будуць весьці падлік бюлетэняў. У гэтых камісіях апазыцыі — мізэрная колькасьць, выцякае з агучаных Ярмошынай лічбаў:

«Апазыцыйныя партыі:

  • „Справядлівы сьвет“ — было вылучана 147 чалавек, уключаны 21;
  • БСДП (Грамада) — 49 і 3;
  • АГП — 172 і 4;
  • БНФ — 96 і 2,
  • Таварыства беларускай мовы — 1 і 1;
  • БНФ „Адраджэньне“ — 51 і 1.

Усяго ўвайшлі ў камісіі 32 чалавекі. Было вылучана ўсяго ад грамадзкіх арганізацыяў такой скіраванасьці 516 чалавек».

Унікальная сытуацыя склалася сёлета ў Менску. Тут сярод лічыльнікаў бюлетэняў няма ніводнага вылучэнца апазыцыі.

Гэтыя дадзеныя яшчэ раз пацьвярджаюць памылковасьць думкі пра тое, што беларускія ўлады пайшлі на лібэралізацыю — упэўнены старшыня партыі БНФ Аляксей Янукевіч:

Алексей Янукевіч

Алексей Янукевіч

«Лібэралізацыя азначае сытуацыю, калі ўлада адпускае кантроль альбо частку кантролю. А ў нас улада адпусьціла палітвязьняў, але не выпускае кантроль. Тое, што ў камісіі ўключылі так мала апазыцыі, якраз і ёсьць сьведчаньне, што кантроль не адпускаецца. Адначасова гэта і сыгнал прэзыдэнцкай вэртыкалі — кантроль нельга здаваць і на мілімэтар. Трэба захоўваць такую ж самую сыстэму татальнага кантролю за выбарамі».

Журналісты сёньня спадзяваліся даведацца ад старшыні Цэнтральнай выбарчай камісіі, як праходзіць праверка подпісаў, якія здалі на праверку ў тэрытарыяльныя камісіі пяць патэнцыйных кандыдатаў на прэзыдэнта. Аднак Ярмошына не дала ніякай інфармацыі, спаслаўшыся на тое, што яшчэ праходзіць праверка і афіцыйных дадзеных аўдыту пакуль няма. Затое старшыня ЦВК рашуча выступіла супраць грамадзкай праверкі подпісаў за вылучэньне кандыдатам на прэзыдэнта Тацяны Караткевіч. Стварэньне такой камісіі яна назвала «самаўпраўствам».

Старшыня ЦВК, у прыватнасьці, заявіла:

«Якая камісія?! Няма ніякіх камісіяў і быць ня можа. Можа, у вас цёткі ў двары сабраліся на лавачцы і таксама назвалі сябе камісіяй. Няма ніякіх камісіяў. Толькі выбарчыя камісіі могуць праводзіць выбары. Гэта непасрэдна запісана ў Канстытуцыі. Усе іншыя дзеяньні ў гэтым пляне — самаўпраўства. Вядома, спадарыня Караткевіч мае права перадаць копіі сваіх падпісных лістоў, калі яны ў яе засталіся, ім для праверкі, калі ёй так хочацца... Але калі мы пабачым, што гэтымі дзеяньнямі дадзеныя грамадзяне неяк перашкаджаюць працы па арганізацыі выбараў, то мы зьвернемся ў органы пракуратуры, каб іх прыцягнулі да адміністратыўнай адказнасьці».

Такая рэакцыя Лідзіі Ярмошынай вельмі зьдзівіла каардынатара працоўнай групы па праверцы подпісаў Юрася Меляшкевіча:

Юры Меляшкевіч

Юры Меляшкевіч

«Мы не прэтэндуем ні на якую абавязковасьць нашай працы. Яна зьвязаная з добраахвотным аўдытам, які пацьвердзілі супрацоўнікі штабу Тацяны Караткевіч, найперш кіраўнік штабу — Андрэй Дзьмітрыеў. Штаб пацьвярджае гатоўнасьць і жаданьне аддаць разгорнутую справаздачу ў грамадзтва. Таму я зьдзіўлены гэтым тонам спадарыні Ярмошынай. Уражаньне такое, што яна пабачыла ў нас канкурэнтаў. Мы абсалютна грамадзкая група. І хочам зрабіць кантроль выключна для транспарэнтнасьці працэсу збору подпісаў».

Адказваючы на пытаньне Свабоды, ці мае юрыдычнае права падключыцца да ўдзелу ў выбарчай кампаніі былы кандыдат на прэзыдэнта і палітвязень Мікалай Статкевіч, Лідзія Ярмошына сказала, што актыўнае выбарчае права ў яго ёсьць. І таму Статкевіч можа ўдзельнічаць у гэтай выбарчай кампаніі альбо як давераная асоба кагосьці з афіцыйна зарэгістраваных кандыдатаў, альбо як назіральнік, альбо як выбарца.

Паказаць камэнтары

XS
SM
MD
LG