Вэстэр Флэнаган, былы супрацоўнік тэлеканалу, на якім працавалі забітыя ім журналісты, застрэліўся, калі быў спынены паліцыянтамі на шашы паблізу Вашынгтона. Паводле паведамленьняў мясцовых уладаў, ён быў дастаўлены ў бліжэйшы шпіталь, дзе памёр ад атрыманага раненьня.
Флэнаган застрэліў 24-гадовую вядоўцу праграмы Элісан Паркер і 27-гадовага апэратара Адама Уорда у жывым этэры, падчас інтэрвію з прадстаўніцай мясцовай дзелавой супольнасьці ў Сміт-Маунцін-Лэйк. Гэта адбылося недалёка ад горада Роанак, разьмешчанага прыблізна ў 375 кілямэтрах на паўднёвы-захад ад Вашынгтона.
На тэлебачаньні Флэнаган працаваў таксама пад псэўданімам Брайс Уільямс. Менавіта пад гэтым імем ён разьмясьціў у сацыяльных сетках кадры, якія захавалі сцэну забойства.
На адным зь іх відаць, як Флэнаган падыходзіць да групы нічога не падазраючых журналістаў, накіроўвае пісталет на Элісан Паркер і страляе некалькі разоў. Паркер падае; пасьля гэтага экран згасае, і чуваць яшчэ некалькі стрэлаў.
Элісан Паркер і Адам Уорд загінулі на месцы.
Вэстэр Лі Флэнаган перад сьмерцю адправіў ліст па факсу на тэлеканал ABC News, у якім патлумачыў матывы свайго ўчынку.
У 23-старонкавым пасланьні Флэнаган апісвае ўсё, што яго не задавальняла ў жыцьці, дадаючы, што жыў «як на парахавой бочцы».
Флэнаган піша, што яго абурала расавая дыскрымінацыя ў ЗША. Ён сам, па ягоных словах, ня раз сутыкаўся з дыскрымінацыяй адразу паводле некалькіх прыкметаў — з-за таго, што быў чарнаскурым і геем.
Флэнаган напісаў таксама, што забіў журналіста і апэратара канала, каб адпомсьціць за стральбу 17 чэрвеня ў афраамэрыканскай царквы ў Чарльстоне, дзе ахвярамі нападу сталі 9 чалавек.
Падчас нападу здымачная група мясцовага тэлеканала WDBJ TV праводзіла інтэрвію зь Вікі Гарднэр — кіраўніцай мясцовай гандлёвай палаты. Гарднэр была параненая ў сьпіну, але засталася жывой.
Адзін з кіраўнікоў WDBJ паведаміў, што журналісты здымалі звычайнае інтэрвію, калі да іх падышоў узброены чалавек. Адзін зь вядоўцаў сказаў: «Яны працавалі над здымкамі тэматычнага сюжэту. Яны не асьвятлялі пратэстаў ці дэманстрацыяў».
Усё гэта адбылося ў 6:45 па мясцовым часе ў жывым этэры. Уорд здолеў на сэкунду зьняць забойцу, пасьля чаго камэра выпала ў яго з рук, і ён упаў на зямлю.
Генэральны мэнэджар тэлеканалу WDBJ Джэфры Маркс разам зь іншымі вядоўцамі, нягледзячы на перажытае ўзрушэньне, паспрабаваў растлумачыць тэлегледачам, што адбылося.
«Мы чулі крыкі. Больш нічога. А потым камэра ўпала», — сказаў Джэфры Маркс.
Як паведамілі супрацоўнікі WDBJ, Флэнаган працаваў на гэтым тэлеканале менш за год, а ў лютым 2013 году быў звольнены.
«Мяркуючы па ўсім, у жыцьці Флэнагана ўсё выйшла з-пад кантролю», — сказаў шэрыф акругі Фрэнклін Біл Овэртан, адказваючы на пытаньні журналістаў, паведамляе «Голас Амэрыкі».
