Лінкі ўнівэрсальнага доступу

Літанкета Свабоды: Зьміцер Вішнёў


Зьміцер Вішнёў
Зьміцер Вішнёў

Зьміцер Вішнёў нарадзіўся ў 1973 у Дэбрэцэне (Вугоршчына). Вучыўся ў БДУ (факультэт журналістыкі) і ў маскоўскім літаратурным інстытуце імя М. Горкага на Вышэйшых літаратурных курсах (сэмінар крытыкі). Працаваў у газэце «Культура», часопісе «Беларусь», літаратурным кансультантам у Саюзе беларускіх пісьменьнікаў, цяпер дырэктар выдавецтва «Галіяфы» і рэдактар літаратурнага альманаха «Тэксты». Адзін з заснавальнікаў літаратурна-мастацкага руху «Бум-Бам-Літ» і суполкі «SCHMERZWERK». Аўтар кніг «Штабкавы тамтам» (1998), «Тамбурны маскіт» (2001), «Трап для сусьліка, альбо Нэкрафілічнае дасьледаваньне аднаго віду грызуноў» (2002), «Вэрыфікацыя нараджэньня» (2005), «Фараон у заапарку» (2007), «Замак пабудаваны з крапівы» (2010), «Шоргат жукоў» (2011), «Сьпітыя баркасы» (2014). У 2014 у выдавецтве «LuxBooks» раман «Замак пабудаваны з крапівы» выйшаў у перакладзе на нямецкую мову.


1. Для каго вы пішаце? (Хто ваш ідэальны чытач?)

Маё вялікае перакананьне, што літаратар мусіць быць эгаістам і пісаць для сябе (хаця бываюць выключэньні з правілаў). Спачатку для сябе, а потым вырашаеш, ці варта гэты твор выносіць на чытацкую аўдыторыю. Мой ідэальны чытач — я сам.

2. Дзе вам найлепш пішацца, і калі?

Проза ў мяне добра пішацца на стыпэндыях. Можна засяродзіцца і сыстэматызаваць працу. А паэзія звальваецца нечакана ў самыя непрадказальныя моманты: у сьпёку падчас шпацыру па мосьце, у самалёце каля ілюмінатара з аблокамі, у цягніку пад грукат колаў, каля мора пад плёскат хваляў, побач з каханай, што п’е духмяную гарбату...

3. Аўтарам якой ужо напісанай кнігі вы хацелі б быць?

З чужых — не хачу, але калі выбіраць са сваіх, дык такой пакуль таксама няма.

4. Які літаратурны герой найбольш падобны да вас?

Сафа Бурштын.

5. Хто ваш улюбёны пісьменьнік?

Ёсьць многа пісьменьнікаў, якія мне цікавыя: Набокаў, Хэмінгуэй, Джойс, Кафка, Лем...

6. Што вы цяпер чытаеце?

Раман Жана Жубэра «Чалавек сярод пяскоў». Паралельна чытаю Чарльза Букоўскага «Хлеб зь вяндлінай» і рукапісы новых беларускіх талентаў.

7. На якіх замежных мовах (расейская ня лічыцца) вы можаце чытаць?

На польскай і на ўкраінскай. Спрабую на нямецкай са слоўнікам (але пакуль гэта накшталт пэрформансу).

8. Якая ваша найбольш улюбёная кніга з напісаных вамі?

З прозы — «Замак пабудаваны з крапівы», з паэзіі — «Сьпітыя баркасы», зь літаратурнай і мастацкай крытыкі — «Вэрыфікацыя нараджэньня».

9. Якую кнігу вам яшчэ хочацца напісаць?

Цяпер працую над раманам — спадзяюся, што ён будзе лепшы за папярэднія. Як кажуць, зьнясе дах і зацягне ў краіну неверагодных прыгодаў. Ёсьць пляны некалькіх дзіцячых кніг.

10. Калі вы адчуваеце сябе найбольш свабодным?

Сярод марскіх хваляў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG