Лінкі ўнівэрсальнага доступу

Капскі пацьвярджае, што Ганчарэнка пакінуў ФК «Урал». «Урал» абвяргае сыход галоўнага трэнэра


Віктар Ганчарэнка

Віктар Ганчарэнка

Паводле сайту pressball.by, беларускі трэнэр екацярынбурскага футбольнага клюбу «Урал» Віктар Ганчарэнка напісаў заяву па ўласным жаданьні і ўжо пакінуў каманду. Паводле кіраўніка каманды БАТЭ Анатоля Капскага, Ганчарэнка сёньня ў 5.40 раніцы ўжо прыляцеў у Менск, і Капскі яго сустракаў у аэрапорце.

Што да прычынаў сыходу Ганчарэнкі з «Уралу», Анатоль Капскі сказаў: «Калі ён прыняў рашэньне аб сыходзе, значыць, на тое ў яго ёсьць важкія падставы. Хачу толькі сказаць адразу: прычына ня ў тым, што яму паступіла больш выгадная прапанова».

Анатоль Капскі

Анатоль Капскі

На расейскіх сайтах зьявіліся вэрсіі, што, маўляў, Ганчарэнка сышоў, каб не здаваць гульні грозьненскаму «Цераку» у наступным туры чэмпіянату Расеі. У заключным матчы мінулага сэзону «Урал» даволі нечакана ў гасьцях перамог у «Церака» зь лікам 3:1. Той матч у многіх выклікаў падазрэньні, і паводле некаторых меркаваньняў, «Урал» зараз павінен вярнуць «доўг». А гэта ніяк не стыкуецца з добрай рэпутацыяй Віктара Ганчарэнкі. Пра магчымы «форс-мажор» у матчы «Урал» — «Церак» падазраюць і букмэкерскія канторы. Каэфіцыент на перамогу грозьненскага «Церака» складае 1,4 да 1, на «Урал» — 5,4, хаця каманды прыкладна роўныя.

На форумах аматары футболу падтрымліваюць Ганчарэнку. На форуме сайту sports. ru зьявіліся камэнтары кшталту: «Калі Ганчарэнка ня стаў класьціся пад „Церак“, то рэспэкт велічэзны. РФПЛ — памыйка», «Ганчарэнка чарговым разам паступіў згодна з сумленьнем, не захацеў аддаваць чужыя даўгі».

Анатоль Капскі адмовіўся камэнтаваць вэрсіі сыходу Ганчарэнкі, заявіўшы, што гэта справа самога Ганчарэнкі і кіраўніка клюбу «Урал».

Ганчарэнка займаў пасаду галоўнага трэнэра «Уралу» з 14 чэрвеня 2015 года. Пад кіраўніцтвам Ганчарэнкі «Урал» правёў у чэмпіянаце Расеі шэсьць матчаў, у якіх здабыў адну перамогу, дзьве нічыіх і тры пройгрышы.

Раней Ганчарэнка трэніраваў краснадарскую «Кубань». А першым яго клюбам быў барысаўскі БАТЭ, які Ганчарэнка вывеў у Лігу чэмпіёнаў.

У вось на афіцыйным сайце клюбу «Урал» зьявілася заява, у якой сьцьвярджаецца, што Віктар Ганчарэнка застаецца галоўным трэнэрам каманды. Футбольны клюб таксама абураецца домысламі некаторых СМІ, называе іх «паклёпам, накіраваным на тое, каб ачарніць імідж клюбу».

XS
SM
MD
LG