Лінкі ўнівэрсальнага доступу

На амэрыканскіх біржах абваліліся курсы акцый і цана нафты


Індэкс Dow Jones перанёс рэкорднае падзеньне. Нафта WTI ўпала да 38 даляраў за барэль.

Таргі на амэрыканскіх фондавых біржах завяршыліся ў панядзелак рэзкім падзеньнем асноўных індэксаў. Самы рэпрэзентатыўны індэкс S&P 500 зьнізіўся амаль на чатыры адсоткі. Індэкс Dow Jones, які адлюстроўвае капіталізацыю 30 найбуйнейшых прамысловых канцэрнаў, упаў на 588 пунктаў, страціўшы каля трох з паловай працэнтаў цаны.

На працягу першых хвілін пасьля адкрыцьця гандлю Dow Jones абрынуўся больш чым на 1000 пунктаў, гэта самае буйное падзеньне ў гісторыі індэксу ў абсалютным выражэньні. Але скупка акцый, распачатая інвэстыцыйнымі фондамі і іншымі буйнымі інвэстарамі, дапамагла, паводле аналітыкаў, з большага нэўтралізаваць нэгатыўныя тэндэнцыі на фондавых біржах.

Падзеньне на амэрыканскіх фінансавых рынках, якое працягваецца ўжо некалькі дзён выкліканае трывогамі з нагоды запавольваньня эканамічнага росту ў Кітаі і магчымых нэгатыўных наступстваў гэтага для амэрыканскіх карпарацый.

Сумневы з нагоды будучыні эканамічнага росту ў Кітаі справакавалі і чарговае рэзкае падзеньне коштаў нафты, якая здабываецца ў ЗША. Заходнетэхасская нафта WTI патаньнела ў панядзелак на пяць з паловай адсоткаў да 38 даляраў 24 цэнтаў за барэль. Нафта маркі Brent страціла на таргах ў Лёндане больш за шэсьць адсоткаў цаны, за барэль там давалі 42 даляры 69 цэнтаў.

Аналітыкі пакуль не бяруцца прадказваць ці зьяўляецца цяперашняе падзеньне кароткатэрміновай карэкцыяй альбо пачаткам зацяжнога спаду.

XS
SM
MD
LG