Справу ўкраінскай ваеннаслужачай Надзеі Саўчанкі будзе разглядаць Данецкі гарадзкі суд Растоўскай вобласьці. Суд не знайшоў дастатковых падстаў для зьмены падсуднасьці справы, прыняўшы ў пятніцу рашэньне адхіліць хадайніцтва абароны аб пераносе судовага працэсу ў Маскву.
Выступаючы на пасяджэньні ў пятніцу, адвакат Ільля Новікаў матываваў неабходнасьць пераносу справы ў Маскву вялікімі выдаткамі для сьведак, у тым ліку на дарогу. Паводле яго, у выпадку абвінаваўчага прысуду гэтыя выдаткі лягуць на Саўчанку. Акрамя таго, у Маскве прасьцей гарантаваць бясьпеку для сваякоў падсуднай і іншых удзельнікаў працэсу.
Пракурор лічыць, што, нягледзячы на цяжар злачынстваў, падсуднасьць пераносіць ня трэба. Судзьдзя літаральна за гадзіну вынес рашэньне, адпаведнае пазыцыі пракурора. Адвакат Ільля Новікаў адразу ж заявіў аб тым, што Надзея Саўчанка сама папрасіла яго не абскардзжваць гэтае рашэньне, г.зн. ніякага пратэсту з боку абароны ня будзе, паколькі, як ён пракамэнтаваў, Надзея хоча, каб суд хутчэй пачаўся і хутчэй скончыўся. На думку адваката, папярэдняе пасяджэньне, аналягічнае тым, якія былі раней у Данецкам гарадзкім судзе, можа прайсьці літаральна на наступным тыдні. Пасьля яго пройдзе некаторы тэрмін — звычайна дзён 10 — і пачнецца разгляд справы па сутнасьці.
Надзея Саўчанка ўдзельнічала ў пасяджэньні па відэасувязі з СІЗА.
У судзе прысутнічалі консул Украіны Аляксандр Коўтун, сястра Надзеі Саўчанкі — Вера, а таксама маці крымскага актывіста Аляксандра Кольчанкі. Перад будынкам суду праходзіў пікет актывістаў пракрамлёўскага «Нацыянальна-вызвольнага руху».
Надзею Саўчанку абвінавачваюць у дапамозе ў забойстве двух супрацоўнікаў ВГТРК летам мінулага году пад Луганскам, дзе яна нібыта вяла карэкціроўку агню ў часе абстрэлу з боку ўкраінскіх вайскоўцаў. Яна абвяргае абвінавачваньні і сьцьвярджае, што ў гэты час была захоплена сэпаратыстамі, а затым перапраўленая ў Расею.
