Лінкі ўнівэрсальнага доступу

Ліпень стаў самым гарачым месяцам за ўсю гісторыю назіраньняў


Навукоўцы кажуць пра «парніковы эфэкт» як прычыну пацяпленьня.

Мінулы ліпень быў самым гарачым месяцам на Зямлі за ўвесь час маніторынгу тэмпэратуры плянэты, а 2015 пакуль што — самым гарачым годам, паведаміла ў чацьвер Нацыянальнае ўпраўленьне акіянічных і атмасфэрных дасьледаваньняў ЗША. Замеры тэмпэратуры афіцыйна вядуцца з 1880 году.

Сярэдняя тэмпэратура на Зямлі ў мінулым месяцы склала 16,61 градуса па Цэльсію. Тэмпэратура за першыя сем месяцаў гэтага году пабіла папярэдні рэкорд 2010 году на 0,09 градуса.

Амэрыканскія спэцыялісты ў якасьці галоўнай прычыны называюць парніковы эфэкт, выкліканы спальваньнем вялікай колькасьці вуглевадароднага паліва.

У канцы лістапада — пачатку сьнежня ў Парыжы пройдзе канфэрэнцыя ААН па глябальным клімаце. Адзін з пунктаў парадку дня канфэрэнцыі — падпісаньне міжнароднай канвэнцыі аб мерах па прадухіленьні росту сярэдняй тэмпэратуры на Зямлі больш чым на 2 градусы ў параўнаньні з даіндустрыяльнай эпохай. У адваротным выпадку, паводле прагнозаў навукоўцаў, чалавецтва чакае пачашчэньне стыхійных бедзтваў — паводак, засух, ураганаў, павышэньне ўзроўню сусьветнага акіяну.

Паказаць камэнтары

XS
SM
MD
LG