Лінкі ўнівэрсальнага доступу

Ці дадуць апазыцыі палічыць бюлетэні? «У нашай прысутнасьці ўлады не зацікаўленыя» — Губарэвіч


Падлік галасоў у Беларусі

Падлік галасоў у Беларусі

У нядзелю 23 жніўня мясцовыя выканаўчыя камітэты ўводзяць спэцыяльных дзяжурных, каб тыя маглі прыняць дакумэнты ад ахвотных працаваць ва ўчастковых выбарчых камісіях. Менавіта на выходны дзень, згодна з каляндарным плянам правядзеньня выбарчай кампаніі, прыпадае апошняя магчымасьць здачы заявак.

Адметнасьць участковых камісіяў у тым, што менавіта тут вядзецца беспасярэдні падлік бюлетэняў. Сёлета такіх камісіяў будзе 6129. Экспэрты цьвердзяць: каб зрабіць аб’ектыўныя высновы аб падліку галасоў выбарцаў, трэба ахапіць назіраньнем як найменей 10% усіх участкаў. Гэта азначае, што дэмакратычная апазыцыя павінна быць прадстаўленая ня меней чым ў 612 камісіях.

Восем дэмакратычных структураў дамовіліся працаваць супольна ў межах кампаніі «Права выбару — 2015». Цікаўлюся ў каардынатара кампаніі Алеся Сілкова, колькі чалавек ужо вылучана ва ўчастковыя камісіі:

«Пакуль дадзеных няма. Яшчэ па рэгіёнах падаюць. Мы не зьвялі яшчэ лічбы. Нешта будзем мець у нядзелю ўвечары. Тут гэтая справа накладаецца на збор подпісаў. Заўтра там апошні дзень, таму ўсе актывісты носяцца зараз з подпісамі».

Рух «За свабоду» ўваходзіць у «Права выбару — 2015». Але, паколькі рух не мае афіцыйна зарэгістраваных філіяў, яго прадстаўнікі могуць вылучацца ў склад участковых камісіяў толькі праз збор подпісаў выбарцаў — тлумачыць першы намесьнік старшыні руху Юрась Губарэвіч:

Юрась Губарэвіч

Юрась Губарэвіч

«І гэта для нас самае складанае. Нашы людзі, нават калі яны трапяць у камісіі, ня будуць адлюстраваныя ў статыстыцы Цэнтарвыбаркаму. Таму ў нашай прысутнасьці ва ўлады няма зацікаўленасьці. Ёй трэба хоць мінімальна паказаць наяўнасьць апазыцыі ў камісіях, а тыя, хто праходзяць праз збор подпісаў, гэтую статыстыку не паляпшаюць. Таму іх можна „рэзаць“ амаль усіх. З-за гэтага мы разумеем, што стаўленьне да нашых вылучэнцаў будзе адмоўнае».

Аб’яднаная грамадзянская партыя сёлета вылучае кандыдатаў ва ўчастковыя камісіі самастойна — адзначае намесьнік старшыні партыі Васіль Палякоў:

Васіль Палякоў

Васіль Палякоў

«Мы плянуем ад кожнай абласной арганізацыі вылучыць чалавек па 15. А агулам гэта будзе чалавек 100». На мінулых прэзыдэнцкіх выбарах найбольш прэтэндэнтаў ва ўчастковыя камісіі выставіла партыя левых «Справядлівы сьвет». Сёлета яна, паводле кіраўніка выбарчага штабу Валера Ўхналёва, таксама актыўна ўдзельнічае ў гэтым этапе выбарчай кампаніі:

«Падаём. Сёньня размаўляў з усімі абласьцямі. Сьпісы гатовыя, і мы іх аддаём у выканкамы. Дакладную лічбу пакуль не магу сказаць. Але, думаю, дзесьці чалавек 300 мы прапануем. Каля гэтага дзесьці будзе».

На выбарах 2010 году апазыцыя вылучыла ў склад участковых камісіяў 1073 чалавекі. Зь іх у камісіі тады трапілі толькі 183 чалавекі, або 17,1%. У выніку апазыцыя была прадстаўленая менш чым у 3% участковых выбарчых камісіяў.

Паказаць камэнтары

XS
SM
MD
LG